“Turan Tovuz”un Konfrans Liqasında oynamaq arzusu çin olmadı. Ona görə ki, CAS UEFA-nın komandanın avrokuboklardan kənarlaşdırılması haqda qərarından şikayəti təmin etmədi.

Xatırladaq ki, buna “bozqurd”un 7 futbolçusunun 2019-cu ildə danışılmış oyunlarda iştirakı və bu üzdən hər birinin futboldan ömürlük uzaqlaşdırılması səbəb olub.

“Football-plus.az” hadisələrin axarıyla bağlı daha detallı məlumat əldə edib. Rəsmi sənədlərə əsasən konkret qərar belədi: “Turan Tovuz” Konfrans Liqası reqlamentinin 4.01 (g) maddəsinə uyğun qəbul meyarını yerinə yetirə bilməyib. Yəni klub birbaşa və ya dolayısı ilə milli və ya beynəlxalq səviyyədə matçın nəticəsinin təşkili və ya ona təsir göstərilməsi məqsədi daşıyan fəaliyyətdə iştirak edib”.

Halbuki reqlamentə əsasən, Konfrans Liqasına vəsiqə qazanan klubun adı son 10 ildə belə məsələlərdə hallanmamalıdı. Bəli, “Turan Tovuz” bu yöndə hüquqlarını müdafiə edib. “Bozqurd”un əsas dəlili klubda olan köklü dəyişikliklər olub. Ancaq danışılmış oyunlarda iştirak edən futbolçuların sayının çoxluğu tovuzluların əleyhinə işləyib. Bu üzdən qərar qüvvədə saxlanılıb.

Həmçinin “Turan Tovuz”un cəzası yalnız bu mövsümü əhatə edir. Klub növbəti mövsüm avrokuboklara vəsiqə qazanacağı halda iştirak hüququndan məhrum edilməyəcək.

KƏNAN BAHADIR