ÇL-in finalının hakimi dəyişə bilər
Futbol dünyası Avropanın ən mötəbər klub turnirinin finalına hazırlaşır. İyunun 10-da İstanbulda Çempionlar Liqasının bu mövsümdəki qalibi bəlli olacaq.
"Football-plus.az" xəbər verir ki, kuboku başı üzərinə ya tarixində ilk dəfə “Mançester Siti”, ya da tarixində 4-cü dəfə “İnter” qaldıracaq. Hakim artıq bəllidi.
UEFA hələ mayın 22-də açıqlamışdı ki, həlledici oyunu Şimon Marçinyakın başçılıq etdiyi polşalı hakimlər briqadası idarə edəcək. Amma 42 yaşlı ədalət təmsilçisi ilə bağlı Avropa mətbuatında sürpriz iddia ortyaya atılıb. Vəziyyət hətta o dərəcədə ciddidi ki, ÇL-in finalı Marçinyakın əlindən alına bilər!
Məsələ burasındadı ki, diskriminasiyaya qarşı mübarizə aparan və irqçiliyin hər cür formasına qarşı çıxan “Never again” təşkilatı Marçinyakın ÇL-in finalından azad edilməsi üçün UEFA-ya rəsmi məktub ünvanlayıb. Sən demə, Marçinyak bugünlərdə vətəni Polşada “Everest” adlı bir tədbirdə iştirak edib. İlk baxışdan burda qeyri-adi bir şey olmasa da, həmin tədbirin polşalı siyasətçi Slavomir Mentsen tərəfindən təşkil olunması vəziyyəti qəlizləşdirib 36 yaşlı bu siyasətçi Polşada “Yeni Ümid” partiyasının sədridi, eyni zamanda “Azadlıq və Müstəqillik Konfederasiyası” partiyasının liderlərindən biridi.
Mentsen Polşada ilk növbədə ultrasağçı siyasətçilərdən sayılır. O, homofobiyaya qarşı olan, eləcə də antisemit açıqlamaları ilə tanınır. Təkcə bir faktı vurğulayaq ki, onun partiyasının əsas şüarı belə səslənir:
“Biz yəhudiləri, homoseksualları, abortları, vergi sistemini və Avropa Birliyini istəmirik”.
O, öz partiyasının ölkədə daha böyük söz sahibi olması arzusundadı. Qeyd olunur ki, Marçinyak bu siyasətçinin təşkil etdiyi tədbirə spiker kimi qatılmışdı. Hətta bəzi mənbələr iddia edir ki, Marçinyak tədbirə FİFA-nın hakimlərə verdiyi forma ilə qatılıbmış. Guya həmin tədbirin reklam çarxında məhz Marçinyakın həmin şəkili qeyd olunub. Təbii ki, UEFA belə qalmaqallı xəbərə biganə qala bilməzdi. Çünki Slavomir Mentsenin partiyasının şüarı UEFA-nın dəyərlərinə tam ziddi. UEFA nümayəndələri dərhal hadisənin təfərrüatını öyrənmək və sözlərini dinləmək üçün Marçinyakla əlaqə saxlayıb. Çoxsaylı şayiələrin ardından Marçinyak susqunluğunu pozaraq sosial şəbəkədə bunları yazdı:
“Heç vaxt hansısa siyası partiyanı və ya konkret bir siyasətçini dəstəkləməmişəm. Ümumiyyətlə, qərarlı şəkildə istənilən radikal, irqçi və antisemit baxışlardan, açıqlamalardan, hərəkətlərdən uzaq durmağa çalışıram”.
Digər xəbərlər
