FİFA Hakimlər Komitəsi DÇ-nin son iki oyunu üçün hakimlər briqadasının tərkibini açıqlayıb.

Təyinatlara toxunmamış bir məqam üzərində xüsusi dayanmaq istəyirik. Bildiyiniz kimi, hələ Qətər mundialı başlamamış FİFA tarixdə ilk dəfə oyunların idarəçilyində 10 hakimin xidmətindən yararlanacağını açıqlamışdı. Qrup mərhələsində və 1/8 finalda bu praktika davam etdi. 1/4 final mərhələsindən etibarən briqadanın tərkibi bir qədər də genişləndirildi və 11 nəfərə çatdırıldı. Belə ki, əvvəlki mərhələlərdə oyunun idarəçiliyinə VAR qarışıq 9 hakim cəlb olunurdusa, artıq 11 nəfər iş başında olacaq. Konkret dekabrın 18-də Argentina və Fransa yığmaları arasında keçiriləcək oyunu idarə edəcək 11 nəfərlik briqadanın tərkibi belədi: referi Şimon Marçinyak (Polşa), referinin 1-ci assistenti Pavel Sokolniçki (Polşa), 2-ci assistenti Tomaş Listkeviç (Polşa), 4-cü hakim İsmail Elfat (ABŞ), ehtiyat hakim Ketrin Nesbitt (ABŞ), videohakim Tomaş Kvyatkovski (Polşa), videohakimin köməkçisi Xuan Soto (Venesuela), ofsayd VAR hakimi Kayl Atkins (ABŞ), videohakimlərin köməkçisi Fernando Gerrero (Meksika), ehtiyat VAR hakimi Bastian Dankert (Almaniya), ehtiyat videohakim köməkçisi Kori Parker (ABŞ).

Futbolun siyasətdən kənar olduğu ilə bağlı çox danışılsa da, reallıq budu ki, final oyunu üçün hakim seçiminə siyasi mülahizələr və özəlliklər təsir göstərdi. Məsələn, Antoni Teylorun başçılıq etdiyi, İngiltərədən olan hakimlər briqadasının komandaları meydana səsləməsi mümkünsüz idi. Axı britaniyalılarla argentinalılar 1982-ci ildə Folklend adaları uğrunda döyüşüb, bu mövzu zaman-zaman gərginliyə səbəb olur.

Eyni zamanda 3-cü yer uğrunda oyunun qətərli referi Əbdülrəhman Əl-Cassimə tapşırılması da maraqlı məqamdı. Görünür, FİFA təşkilatçı ölkəyə məhz bu yolla minnətdarlıq etməyə qərar verib. Final oyununu idarə edəcək hakimlər briqadasında bir braziliyalı da yoxdu. Hərçənd Cənubi Amerikanın bir ölkəsinin təmsilçilərinin əzəli rəqib ölkənin yığmasının oyununa cəlb olunmasıyla bağlı onlarla nümunə var. Sadəcə, Pyerluici Kollina ilə Massimo Buzakka bu dəfə risk etməyi lazım bilməyib. Belədə həlledici oyun yaxşıların ən yaxşısına yox, uyğun bilinən, heç kimdə narazılıq doğurmayacaq personaya tapşırılıb. Əslində Marçinyakı turnirdən əvvəl də finalı idarə etməyə real namizədlır sırasına salanlar çox idi. Yəni UEFA-nın siyahısında da ilk “5-lik”də idi. Hər halda, polşalı yetərincə təcrübəlidi. 41 yaşı var, ancaq ölkəsinin çempionatında 300 oyun həddini çoxdan arxada qoyub. Bu isə yaxşı göstəricidi.
Marçinyakın vaxtilə “Qarabağ”la yolunun kəsişdiyini də xatırladaq. Avropa Liqasının 2013/14 mövsümünün pley-offunda ağdamlıların avqustun 22-də evdə “Ayntraxt”a qarşı keçirdi və 0:2 uduzduğu oyunu polşalı referi idarə edib. DÇ-nin finalında da iş başında olacaq Pavel Sokolniçki ilə Tomaş Listkeviç də Marçinyaka yardım edib. Daha bir maraqlı məqam odu ki, adı çəkilən referi “Qarabağ”ın bu yay, iyulun 12-də evdə Polşa çempionu “Lex”i 5:1 hesabıyla məğlub etdiyi oyuna biganə qala bilməyib. FIFA referisi “instaqram” səhifəsində Çempionlar Liqasının 1-ci təsnifat mərhələsinin cavab oyunundakı hakim qərarlarını şərh edərkən ağdamlıların iki qolunun qaydalar çərçivəsində vurulmadığını yazıb. Marçinyakın sözlərinə görə, VAR sistemi olsaydı, həmin qollar qeydə alınmazdı...