Bilindiyi kimi, avrokuboklarda qarşıda bizi həlledici görüşlər gözləyir.

"Football-plus.az" xəbər verir ki, iyunun 10-da İstanbulda keçiriləcək Çempionlar Liqasının finalında “Mançester Siti” ilə “İnter”, mayın 31-də Budapeştdə keçiriləcək Avropa Liqasının finalında “Sevilya” ilə “Roma” və iyunun 7-də Praqada keçiriləcək Konfrans Liqasının finalında “Fiorentina” ilə “Vest Hem” qarşılaşacaq.

UEFA hər üç final üçün hakim təyinatlarını açıqlayıb. Böyük səbirsizliklə gözlənilən ÇL-in finalını polşalı Şimon Marçinyak idarə edəcək. 2011-ci ildən FİFA referisi stausunda olan 42 yaşlı bu ədalət təmsilçisi bəlkə də karyerasının zirvə nöqtəsini yaşayır. Çünki Marçinyak ötən il Qətərdə keçirilən mundialın Argentina ilə Fransa arasında oynanılan finalını da idarə etmişdi. Elə ən son ÇL-in yarımfınalının cavab oyunu çərçivəsində “Mançester Siti”nin “Real”ı darmadağın etdiyi görüşdə də fit sahibi Marçinyak idi. AL-in finalını ingiltərəli Entoni Teylor idarə edəcək. 44 yaşlı ədalət təmsilçisi daha öncə 2020-də Avropa superkuboku uğrunda matçı, eləcə də 2021-də Millətlər Liqasının finalını idarə edib. KL-in həlledici oyununa isə ispaniyalı Karlos del Serro Qrande təyinat alıb. Son AÇ-yə dəvət alan hakimlərdən olan 47 yaşlı bu referi buna qədər beynəlxalq turnirlərdə final idarə etməyib.

ÇL-in finalından söz düşmüşkən, bir xəbəri də diqqətinizə çatdıraq. DÇ-də və ÇL-də qalib gəlmək bəlkə də hər peşəkar futbolçunun ən böyük iki arzusudu. Bu mövsüm ya “Mançester Siti”də Xulian Alvares, ya da “İnter”də Lautaro Martines bu titulların ikisini birdən qazanacaq! Hər iki futbolçu artıq Argentinanın heyətində DÇ-2022-nin qalibi olub. Alvareslə Martinesdən biri futbol tarixində eyni mövsümdə həm DÇ-ni, həm də ÇL-i qazanan cəmi 9-cu futbolçu olacaq. Daha öncə bunu Zepp Mayer, Frants Bekkenbauer, Hans-Georq Şvartsenbek, Paul Braytner, Uli Höness, Herd Müller (hamısı “Bavariya” və Almaniya yığması, 1973/74), Kiristian Karambö (“Real” və Fransa yığması, 1997/98) və Roberto Karlos (“Real” və Braziliya yığması, 2001/02) bacarıb.