Bilindiyi kimi, bu mövsüm Çempionlar Liqasının finalına qardaş Türkiyə evsahibliyi edəcək.

"Football-plus.az" xəbər verir ki, həlledici qarşılaşma iyunun 10-da “Atataürk Olimpiya” stadionunda keçiriləcək. Bir müddət öncə İngiltərə mətbuatı heç bir qaynaq göstərmədən və heç bir ciddi əsas olmadan final qarşılaşmasının türklərdən alınacağını iddia etmişdi. “Deyli Meyl” nəşri yazmışdı ki, guya mayın 14-də Türkiyədə keçiriləcək prezident seçkilərindən sonra ölkədə vəziyyət gərginləşə və qarışıqlıq yarana bilər. Aprelin 18-də ortaya atılan bu iddiaya UEFA-dan heç açıqlama və ya reaksiya gəlməmişdi. Qurumun sakit qaldığını görən ingilislər srağagün bir qədər də irəli gedərək finalın Türkiyədən alınaraq konkret Portuqaliyaya veriləcəyini iddia etdi. Dünyanın aparıcı nəşrləri də məhz ingilislərin özlərindən uydurduğu iddiaya əsasən bu xəbəri paylaşmağa başladılar. Məsələnin böyüdünü görən UEFA dünən, nəhayət, rəsmi bəyanat yaydı. Qurum bu iddianı birmənalı şəkildə rədd etdi: “2023-cü ildə Çempionlar Liqasının finalı əvvəlcədən planlaşdırıldığı kimi iyunun 10-da İstanbulda keçiriləcək. UEFA-nın bu məsələ ilə bağlı heç bir siyasi qurum, hökümət və ya federasiya nümayəndələri ilə görüşü olmayıb”. Ümid edək ki, ingilislər heç olmasa, bu dəfə türklərdən əl çəkəcək. Çünki son 3 ildə zatən ÇL-in finalı iki dəfə İstanbuldan alınıb.

Yeri gəlmişkən, “Atatürk Olimpiya” stadionu ilə bağlı bir xəbəri də diqqətinizə çatdıraq. Türkiyə Futbol Federasiyası hələ mayın 6-da açıqlamışdı ki, ÇL-in finalına hazırlıq məqsədi ilə artıq bu arenada heç bir futbol qarşılaşması keçirilməyəcək. Bu üzdən 34-cü tur çərçivəsində mayın 16-da keçirilməli olan “İstanbulspor” – “Qalatasaray” matçının harda keçiriləcəyi bilinmirdi. Debütant “İstanbulspor”, adətən, ev oyunlarını “Nəcmi Kadıoğlu” stadionunda keçirir. Amma bu komanda bilet satışından əldə olunan gəliri nəzərə alaraq nəhənglərə qarşı oyunları “Atatürk Olimpiya”ya salırdı. “İstanbulspor”un “Qalatasaray”ı “Vodafon Park”da qəbul etmək istəyi TFF və “Beşiktaş” tərəfindən rədd edilmişdi. Artıq oyunun baş tutacağı stadionun adı açıqlanıb. “İstanbulspor” – “Qalatasaray” matçı “Kasımpaşa”nın ev oyunlarını keçirdiyi “Rəcəp Tayyib Ərdoğan”da oynanılacaq. Amma “Vodafon Park” da boş qalmayacaq. Bütün ev oyunlarını “Atatürk Olimpiya”da keçirən “Fatih Karagümrük” 34-cü turda “Adana Dəmirspor”u məhz “Beşiktaş”ın meydanında qəbul edəcək. Onu da bildirək ki, artıq paytaxtımızda olan və bu gün xeyriyyə matçında “Sabah”la qarşılaşacaq “Beşiktaş” 34-cü turda çempionatdan çəkilən “Qaziantep”lə oynamalı olduğuna görə istirahət edir.