İlin ən vacib qarşılaşmasına Şimon Marçinyakın başçılıq etdiyi polşalı hakimlər briqadası təyinat alıb.

Football-plus.az xəbər verir ki, o, bu turnirdə cəmi 2 oyun idarə edib və hər iki qarşılaşma finalçıların iştirakı ilə keçirilib. Söhbət qrup mərhələsində Fransanın Danimarkanı, 1/8 finalda isə Argentinanın Avstraliyanı 2:1 hesabı ilə yendiyi oyunlardan gedir.

2006-cı ildə həvəskar futbolan ayrılaraq hakimliyə yönələn Marçinyak 2011-də FİFA referisi statusu alıb. AÇ-2016-ya və DÇ-2018-ə də təyinat alan polşalı referi AÇ-2020-də isə bəxtsizliklə üzləşərək koronavirus üzündən turnirdən kənar qalmışdı. Hətta ürəyindəki problemlər və taxikardiya üzündən bir müddət hakimlikdən əl çəkməli olmuşdu. Həyat indi sanki ona öz borcunu qaytarır.

Marçinyakın hakimliyə gəlişinin isə maraqlı tarixçəsi var. Bir dəfə futbol oynadığı dönəmdə qırmızı vərəqə aldıqdan sonra o, matçın ardından hakimə eitrazını bildirir. Hakim isə ona “bu işin belə asan olduğunu düşünürsənsə, gəl özünü yoxla” cavabını verir. Bu ifadə Marçinyakın həyatını dəyişir və o, hakimlik kurslarına yazılır...