“Neftçi” və “Turan Tovuz” azarkeşləri arasında nifaq toxumları səpmək istəyən bəzi qüvvələr var. İstəklərinə nail olmaq üçün səfərbər olublar. Adlarını bilməsəm də, əksəriyyətini üzdən tanıyıram. Tovuzluların Bakı səfərlərində yaşadığı problemləri qabardaraq “Neftçi”nin Tovuz səfərlərinə yansıtmağa çalışırlar. Halbuki həmin problemlərlə, demək olar, bütün klublar vaxtaşırı qarşılaşır. Bu şəxslər sözün əsl mənasında Azərbaycan futbolunun layiqli qələbələrlə, baxımlı oyunlarla yox, insidentlərlə gündəmə gəlməsində maraqlıdı.

Son aylarda “Neftçi”nin bəzi azarkeşləri də bədniyyətli əməllərin iştirakçısına çevrilib. Matçları televiziyadan, internetdən izləyənlər, stadiona gəlməyənlər rahat sosial şəbəkələrdə “Turan Tovuz” azarkeşlərini qıcıqlandıracaq ifadələr işlədir. Xüsusilə “Tik-Tok”da. Mən hamısını izləyirəm. Gündəmdə olanlar əsl “Neftçi” sevdalıları, tribuna azarkeşləri deyil. Onların “ağ-qaralar”ı həqiqətən sevib-sevmədiyi də şübhəlidi. Ancaq təxribat yaratmaq, həqiqətə uyğun olmayan iddialar və xoşagəlməz ifadələrlə ara qatmağa çalışırlar.

Bundan başqa, bəzi tovuzlular da var ki, ya bu təxribatların bir parçasıdı, ya da fərqində olmadan hisslərə qapılaraq sərt reaksiya verirlər. Dediyim kimi, məsələnin kökü çox dərindi. Tovuzda “Neftçi” azarkeşləri həmişə hörmət, ehtiram, xüsusi qonaqpərvərlik ilə qarşılanıb. Əlbəttə, əhali ilə münasibətlərimiz indi də elədi. Lakin özünü “Turan Tovuz” azarkeşi kimi təqdim edib başqa niyyətlər güdənlərin sayı da az deyil. Gələk əsas məsələyə.

Əvvəlcədən vurğulayım ki, mən spirtli içki içmirəm və buna qarşıyam. Bizim uşaqlar matçdan bir gün əvvəl ad günü məclisində spirtli içki qəbul ediblər. Oyun günü Bakıdan təxminən 35 nəfərdən ibarət “Forza Neftçi” fanklubu ilə birlikdə Tovuza yola düşdük. 5 saatlıq uzun və yorucu yolda istirahət üçün dayandıq. Fanklub üzvlərindən 3 nəfər bir bokal pivə, mən də daxil olmaqla başqaları çay içdi. Stadiona vaxtında çatmışdıq. Bizi çox ciddi yoxladılar. Açığı, belə olacağını gözləmirdik. Polislərdən biri pivə içən azarkeşlərdən spirtli içki qoxusu gəldiyinə görə onları stadiona buraxmadı. Halbuki onlarda heç bir sərxoşluq əlaməti yox idi. Biz polisin bu addımına qəti etirazımızı bildirdik. “Neftçi”nin rəsmiləri də məsələyə qarışdı.

Daha sonra bizi stadionun arxa qapısına aparıb bir müddət gözlətdilər. Oyun artıq başlamışdı. Ön girişə qayıdıb içəri keçmək istəsək də, cəhdlərimiz nəticəsiz qaldı. Polis spirtli içki qoxusu gələn azarkeşlərin buraxılmayacağını, bizim isə keçə biləcəyimizi dedi. Bu qərarla razılaşmadığımız üçün hamımız avtobusa minib geri qayıtmaq məcburiyyətində qaldıq. Ümumiyyətlə, futbol əyləncəli idman növüdü. Azarkeşlər stadiona vaxtını səmərəli keçirmək üçün gedir. Bir çox ölkələrdə, xüsusilə Avropada futbolsevərlər tribunada spirtli içki qəbul edə-edə oyunları izləyir.

Yeri gəlmişkən, “Neftçi”nin azarkeşlərindən biri hazırda Amsterdamdadı. Orda keçirilən oyunları tribunadan izləyir. Dəfələrlə tribunada pivə içərkən çəkdirdiyi şəkilləri bizlə paylaşıb. “Neftçi” rəhbərliyi ilə iclaslarda azarkeşlərin üzləşdiyi problemləri qaldırmışam. Bizə kimin nə etmək istədiyi bəllidi. Buna imkan verməyəcəyik. Klub olaraq, belə təxribatların qarşısını almaq üçün çalışırıq.

“Başverənlərdən xəbərimiz var. Hadisə haqda məlumat alan kimi matçın AFFA nümayəndəsi ilə əlaqə saxladıq. Öyrəndik ki, azarkeşlərdən birinin oyuna buraxılmaması səbəbindən başqaları da qarşılaşmanı izləməkdən imtina edib.

Bizim üçün həssas mövzu olduğundan məsələni diqqətdə saxlayırıq. Əlimizdən gələni edəcəyik ki, qonaq azarkeşlər bundan sonra stadiona daxil olmaqda çətinlik çəkməsin. Ümumilikdə təhlükəsizlik tədbirlərinə meydan sahibi klublar cavabdehdi. Bütün klubların azarkeşlərlə işləyən nümayəndələri var. Düşünürük ki, onlar hər oyundan öncə sıx əlaqədə olsalar, ümumi işin xeyrinə olar”.