Rafael Benites ÇL-in “Liverpul” – “Real” oyunu ərəfəsində İspaniyanın “Marka” nəşrinə açıqlamalar verib.

Bilindiyi kimi, təcrübəli ispaniyalı mütəxəssis hər iki klubda baş məşqçi kimi çalışıb. O, 2005-də “Liverpul”un başında ÇL-i qazanıb. Özü də finalda Karlo Ançelottinin əzəmətli “Milan”ını üstələyərək. “Real”ın başında isə Benites cəmi bir neçə ay işlədikdən sonra 2016-nın yanvarında qovulmuşdu:

“Kimə azarkeşlik edəcəm? Heç kimə. Sadəcə, gözəl oyundan zövq almağa çalışacam. Mən “Real”a hələ 13 yaşımda gəlmişəm və orda bir neçə il keçirmişəm. Baş məşqçi işlədiyim dönəmlə bağlı da xoş xatirələrim qalıb.

Baxmayaraq ki, bir çoxları mənim dönəmimin uğursuz olduğunu düşünür. Amma bununla razı deyiləm. Bizə, sadəcə, işimizi başa çatdırmağa imkan vermədilər. Həmin mövsüm bütün turnirlərdə işlərimiz qaydasında gedirdi. ÇL-də yaxşı oynayırdıq. Kubokda məndən asılı olmayan səbəblərdən (“Real” həmin vaxt cəzalı futbolçu oynatdığı üçün turnirdən kənarlaşdırılmışdı – red.) mübarizəni dayandırdıq. La Liqada “Barselona”dan 2 xal geridə idik və onlardan 2 oyun az keçirmişdik.

Qısası, “Real” 2015/16-da ÇL-i mənim yaratdığım komanda ilə qazandı! Kazemiro, Kovaçiç və Vaskes mənim dönəmimdə transfer olundu. Onlar komandaya balans gətirdi. Həmin vaxt mərkəz hücumçusuna ehtiyac duyurduq. Benzema oynamadıqda çətinlik çəkirdik. Amma rəhbərlik hücumçu almağa ehtiyac görmədi. Fiziki cəhətdən komanda yaxşı durumda idi. ÇL-də hələ də 8:0-lıq rekord bizə məxsusdu. “Malmö”nü bu hesabla yenmişdik. Bundan başqa, “Liverpul” ilə də “Beşiktaş”la oyunda bu cür qələbəm olub. “Real”la “Rayo Valyekano”nu 10:2 yenmişdik. Yəni dediyim kimi vəziyyət acınacaqlı deyildi. Sadəcə, qarşıdan prezident seçkisi yaxınlaşırdı və səhv etmək olmazdı. “Liverpul”da 5,5 il çalışdım. Yəni amerikalılar klubun başına gələnə qədər. Orda sonuncu mövsümümdə pulumuz yox idi. Buna baxmayaraq, “Liverpul”la bağlı yalnız xoş xatirələrim var. Ailəm indiyə qədər də orda yaşayır. Özümə orda çoxlu dost qazandım. Məntiqlə düşünəndə “Liverpul”un qələbəsini arzulamalıyam. Amma digər tərəfdən “Real”ın uduzmasını istəmirəm. Ançelottini gördükdə aramızda 2005-dəki final barədə söhbət olmur. Bilirəm ki, o, həmin finalı xatırlamağı xoşlamır. Amma mən də 2 il sonrakı – Afinada baş tutan finalı xatırlamağı xoşlamıram. Afinada biz daha yaxşı oynamışdıq və qələbəyə layiq idik. Amma uduzduq. Futbol məhz belə oyundu. İstanbulda isə “Milan” üstün oynasa da, biz qalib gəldik. Bir məqam dəqiqdi ki, İstanbuldakı final dramatiklik baxımından avrokuboklar tarixinin ən yaxşı finalıdı və hələ uzun illər də belə qalacaq”.