La Liqanın 29-cu turunda “Barselona”ya 0:4 hesabı ilə məğlub olan “Real”da tezliklə məşqçi dəyişikliyi ola biləcəyi ehtimal edilirdi.

Rəhbərlik artıq baş məşqçisi Karlo Ançelotti ilə bağlı qərar verib. “Marka” qəzetinin xəbərinə görə, “Barselona”ya evdə rüsvayçı məğlubiyyətə baxmayaraq, Madrid klubu italiyalı mütəxəssisi yaxın günlərdə istefaya göndərməyəcək. Ançelottinin klubla daha bir illik müqaviləsi var və hazırda heç kim anlaşmanı ləğv etmək haqda düşünmür.

“Marka”nın xəbərində Florentino Peres ilə baş məşqçi arasında saatyarım çəkən görüş keçirildiyi bildirilir. Bu mənbəyə görə, klubun prezidenti Ançelottiyə tam dəstək verib və onun bacarığına inamın hələ də böyük olduğu vurğulanıb. Yeri gəlmişkən, “Real” hazırda La Liqada 66 xalla 1-ci yerdədi. Ançelottinin komandası Çempionlar Liqasında da qalib adı uğrunda mübarizəni davam etdirir.