Ötən yay “Kəpəz”lə anlaşan Rauf Əliyev, Əfran İsmayılov və Elvin Yunuszadənin Tərlan Əhmədovun gəlişindən sonra əsas komandadan uzaqlaşdırıldığından xəbəriniz var.

Klub rəhbərliyi neçə vaxt idi “üçlük”lə vilaşmaq istəsə də, futbolçular müqavilə müddətinin sonuna qədər klubda qalacaqlarını, anlaşmada qeyd olunan məvacibi son qəpiyinə qədər almadan heç yerə getməyəcəklərini deyirdilər. Ancaq bugünlərdə məsələnin həll olunduğu, Rauf Əfran və Elvinin qarşılıqlı razılıq əsasında “sarı-göylər”dən ayrıldığı ilə bağlı xəbər yayılıb. Söylənilənləri dəqiqləşdirmək üçün Gəncə təmsilçisinin İdarə Heyətinin sədri İlqar Nadiri ilə əlaqə saxladıq. Onunla söhbətdə bizi maraqlandıran başqa suallara da cavb tapmağa çalışdıq.

- Yayılan xəbərlərə inansaq, artıq Tərlan Əhmədovun komandada görmək istəmədiyi Rauf Əliyev, Əfran İsmayılov və Elvin Yunuszadə ilə qarşılıqlı razılıq əsasında yolları ayırmısız.
- Adını çəkdikləriniz təcrübəli, ölkə futbolunda iz qoymuş, millinin şərəfini qorumuş oyunçulardı. İstəməzdik ki, onların “Kəpəz” karyerası belə alınsın. Hər birinə böyük hörmətim var. Ancaq futbolda belə hallar olur. Hər biri ilə danışdım, fikirlərimizi bölüşdük. Sağ olsunlar, sonda məni başa düşdülər və qarşılıqlı razılıq əsasında yollarımızı ayırdıq.

- Belə çıxır ki, məhz siz işə qarışandan sonra məsələ həllini tapıb. Olmazdı ki, bunu daha tez edəydiz...
- Hər bir işin öz vaxtı, məqamı var. Futbolçularla danışmağı, onları razı salmağı klubun idman direkoruna və maliyyə məsələsinə baxan şəxsə tapşırmışdım. Nəticə olmadığından işə qarışdım, onlarla görüşdüm. Bir-birimizi dinlədik, fikir mübadiləsi apardıq və sonda ortaq məxrəcə gəldik. Hər birimiz futbol camiəsinin bir üzvüyük. Bir günlə heç nə bitmir. Elə münasibət qurmaq, addım atmalıyıq ki, sabah bir-birimizi görəndə gözümüzün içinə dik baxa bilək. Heç kim heç kimdən utanmasın, üz-üzə gələndə yolunu dəyişməsin. Mən həyatda da, işdə də bu prinsipə riayət edirəm.

- Yəqin ki, hər üç futbolçuya müəyyən qədər təzminat ödəniləcək. Futbolçularla necə razılaşdız, sirr deyilsə, detallar barədə məlumat verərdiz.
- Onlara qarşıdakı 3 ayın maaşı ödəniləcək.

- Əfran İsamayılov açıqlamasında məşqçi kurslarına qatılacağını, “Kəpəz”də çalışacağını söyləyib. Belə çıxır ki, İsmayılova təzminatla yanaşı, iş də təklif etmisiz.
- Bəli, Əfran B kateqoriyası kurslarına qatılmaq istəyir. Məşqçi kursuna qatılan şəxs mütləq hansısa klubun aşağı yaş qrupunda çalışmalıdı. O da məndən bu yöndə kömək etməyi xahiş etdi. Əfrana bu imkanı yaradacağıma söz verdim. Ancaq bu o demək deyil ki, “Kəpəz”in akademiyasının məşqçisidi. Bildiyiniz kimi, bizim aşağı yaş qruplarının hamısının çalışdırıcısı var. Əfran sabah imtahan verib kursu uğurla başa vuracağı halda yığmada, başqa klubda və yaxud ölkə xaricində çalışa bilər. Biz ona ancaq kursda olduğu müddətdə məşqçi kimi çalışmağa şərait yaradacağıq.

- Akademiyadan söz düşmüşkən, bu sualımızı da cavablamağınızı istərdik. Bir neçə ay öncə akademiyanın 2022-ci ilin sonunda istifadəyə veriləcəyi söylənilirdi. Amma hələ ki bu yöndə bir yenilik yoxdu.
- Akademiyanın inşası yekunlaşmaq üzrədi. Bir ara havalar soyuq keçdiyindən kommunikasiya işləri ləngidi. Tezliklə akademiyanın inşası başa çatacaq, klubun sərəncamına veriləcək.

- Sualı bir qədər də konkretləşdirsək, akademiyanın açılışı nə vaxta planlaşdırılıb?
- Fikrimcə, çox gec olmaz. Bu ilin ilk rübünün sonuna kimi bütün işlərin yekunlaşacağı gözlənilir. Açılış, istismara veriləcəyi tarixini isə dəqiq deyə bilmərəm.

- Qəzalı vəziyyətdə olan Gəncə şəhər stadionundan nə xəbər? Yenilik gözlənilir?
- Stadion məsələsi ən yaralı yerimizdi. Çox istərdim ki, bir gün səhər yuxudan oyanaq və eşidək ki, Gəncə stadionu ilə bağlı konkret qərar var. Ancaq hələ ki bir yenilik yoxdu.

RƏŞAD