Əfran İsmayılov: “Böyük ehtimalla əvəzedici heyətdə oynayacam”
İki gün öncə "Kəpəz" Türkiyədə təlim-məşq toplanışına başlayıb.
Football-plus.az xəbər verir ki, diqqəti çəkən məqam təcrübəli futbolçulardan Rauf Əliyev, Əfran İsmayılov və Elvin Yunuszadənin düşərgədən kənarda qalmasıdı. Futbolçuların mövsümün sonuna kimi Gəncə təmsilçisiylə müqavilələri olsa da, baş məşqçi Tərlan Əhmədov onları komandada görmək istəmir. Bu üzdən klub rəhbərliyi adı çəkilənlərlə ortaq məxrəcə gəlib, onları yola salmağa çalışır.
Amma dünən əlaqə saxladığımız Əfran İsmayılov problemin həllini tapmadığını söylədi. Təcrübəli yarımmüdagiəçi mövsümü böyük ehtimalla “Kəpəz-2”də başa vuracaq:
"Fasilədən istifadə edib Ümrə ziyarətində oldum. Bacardıqca hər il gedirəm. Hazırda isə ali təhsilimlə bağlı imtahanlar verirəm. "Kəpəz" rəhbərliyi ilə danışığımız olub. Onlara müqaviləmin olduğunu və mövsümün sonuna qədər klubda qalacağımı demişəm. İnstitutla bağlı 5-10 günlük işim qalıb. Onları yekunlaşdırandan sonra rəhbərliklə bir də danışacağıq. Rauf hazırda Moskvadadı, Elvindən isə xəbərim yoxdu. Dəqiq deyə bilmərəm, onlar komandada qalacaqlar, ya yox. Amma düşünürəm ki, müqavilələri var, boşuna komandadan getməyəcəklər. Mən "Kəpəz-2"də oynamağa hazıram. Sağ olsun Xaliq müəllim (əvəzedici heyətin baş məşqçisi – Xaliq Mərdanov – red.), təcrübəli futbolçulara həmişə hörmət edir və onların xidmətindən yararlanır. Odu ki, rəhbərliklə razılığa gələndən sonra böyük ehtimalla əvəzedici heyətdə oynayacam".
ABDULLA İSMAYILOĞLU
Digər xəbərlər
