Premyer-liqa və birinci diviziondan fərqli Region Liqasında mövsümün ikinci yarısına start verilib.

Football-plus.az xəbər verir ki, Ötən həftənin istirahət günlərində Şimal-Qərb və paytaxt regionunda çıxış edən komandalar meydana çıxıb.

Şimal-Qərb regionu

İlin ilk turu sensasiyasız ötüşməyib. Qış fasiləsinə zirvədə yollanan “Karvan” səfərdə gözlənilmədən “Göygöl”ə yenilib. Eyniadlı bölgəni təmsil edən komanda yevlaxlıların qapısından iki cavabsız top keçirib. Mövsümün əvvəlindən ilk pillədə qərarlaşan, 7-ci turda qalmaqallı matçda “Karvan”a uduzmaqla “taxtdan düşən” “Marxal” “Qala”nı böyük hesabla yenərək yenidən zirvəyə yülsəlməyi bacarıb. Nəinki qrupun, Region Liqasının ən zəif komandası olan “Şəki” bu dəfə də meydanı boynubükük tərk edib. “Halvaçılar” hesabat turunda doğma azarkeşləri önündə “Göyəzən”ə biabırçı hesabla uduzub. “Ağstafa” – “VT Gəncə” qarşılaşması isə mətbuata açıqlanmayan səbəbdən baş tutmayıb. 8 turdan sonra “Marxal” birinci pillədə qərarlaşıb. İki xal geri qalan “Karvan” isə ikinci yerdədi. “Qala” 13 xalla qrup üçüncüsü olsa da, qalan turlarda liderlərə çatacağı inandırıcı görünmür. Regionun ən sərrast futbolçusu isə Arzuman Vəliyevdi. “Göyəzən”nin “vuran ayağı”nın hesabında 15 qol var. “Marxal”ın forvardı Ceyhun Rəcəbli ondan iki top geri qalır.

Göygöl – Karvan (Yevlax) 2:0
Marxal (Şəki) – Qala (Şəmkir) 5:1
Şəki - Göyəzən (Qazax) 1:9
Ağstafa – VT Gəncə oyunu keçirilməyib.

1. Marxal 8 7 0 1 38-6 21
2. Karvan 8 6 1 1 16-3 13 19
3. Qala 8 4 1 3 17-13 13
4. Göyəzən 8 3 2 3 26-22 11
5. Göygöl 8 3 2 3 16-12 11
6. Ağstafa 7 3 1 3 24-22 10
7. VT Gəncə 7 1 1 5 19-24 4
8. Şəki 8 0 0 8 6-60 0

Bombardirlər: Arzuman Vəliyev (Göyəzən) – 15, Ceyhun Rəcəbli (Marxal) – 13, Ravil Yusifli (Marxal) – 12.

Paytaxt regionu

A qrupunda baş tutan iki görüşdə meydan sahibləri böyükhesablı qələbəyə sevinib. “Mübariz” “doğma divarlar” arasında “Bakı Atletik”i, “Qusar” isə “Gəncliy”i meydana çıxmağa peşman edib. “Bakı Atletik”in təsəlli qoluna gücü çatsa da, “Gənclik” rəqib qapıçını məyus edə bilməyib. Bu qrupda da bir görüş təxirə salınıb. “Dirçəliş” – “Şirvanovka” matçı təqvimdə nəzərdə tutulan gündə gerçəkləşməyib. Keçirdiyi 7 oyunda məğlubiyyət acısı dadmayan “Qusar” lider kimi yoluna davam edir. Bir oyun az keçirən “Rekord”un isə hesabında 15 xal var və ikinci pillədə qərarlaşıb. Qrupun bombardiri liderin hücumçusu Sərxan Ağayevdi. O 7 qarşılaşmada 19 dəfə fərqlənib. “Mübariz”in futbolçusu Cəfər Şahmuradov 17 qolla ikincidi.

A qrupu
Mübariz – Bakı Atletik 8:1
Qusar - Gənclik 8:0
Dirçəliş – Şirvanovka oyunu keçirilməyib.

1. Qusar 7 6 1 0 42-3 19
2. Rekord 6 5 0 1 24-2 15
3. Şirvanovka 6 3 2 1 11-2 11
4. Dirçəliş 6 2 2 2 11-11 8
5. Gənclik 7 2 1 4 7-30 7
6. Mübariz 7 2 0 5 24-26 6
7. Bakı Atletik 7 0 0 7 4-49 0

Bombardirlər: Sərxan Ağayev (Qusar) – 19, Cəfər Şahmuradov (Mübariz) – 17.

B qrupu

B qrupunda “Difai” uğurlu seriyanı yeni ildə də davam etdirir. Bakı təmsilçisi bu dəfə “Cürət”in qapısını aşsüzənə döndərib. Ötənilki çempion “Cəbaryıl” 2022/23 “futbol ili”ndə çempion adını doğrultmur. Rayonun eyniadlı komandası hesabat turunda qrupun autsayderi İCBFA ilə “sülh bağlayıb”. “Çinar-Zəngilan” isə səfərdə “İrəvan”dan üstün olub. 7-ci turun oyunları bir daha göstərdi ki, “Difai” və “Çinar-Zəngilan” pley-offa vəsiqə qazanmaqda çətinlik çəkməyəcək. Qrupun ən çox fərqlənən futbolçusu Eşqin Tağıyevdi. “Difai”nin şərəfini qoruyan forvard artıq 19 dəfə rəqibləri məyus edib. Sergey Markelov Eşqini qarabaqara izləyir. “Çinar-Zəngilan”da oynayan futbolçunun hesabında 17 qol var.

Difai – Cürət 8:1
Cəbrayıl – İCBFA 1:1

İrəvan – Çinar-Zəngilan 3:6
1. Difai 7 7 0 0 46-9 21
2. Çinar-Zəngilan 7 6 0 1 40-8 18
3. Cəbrayıl 7 3 2 2 22-16 11
4. İCBFA 7 2 2 3 12-16 8
5. Lokomotiv 5 1 0 4 11-26 3
6. İrəvan 6 1 0 5 9-43 3
7. Cürət 7 1 0 6 17-39 3

Bombardirlər: Eşqin Tağıyev (Difai) – 19, Sergey Markelov (Çinar-Zəngilan) – 17.

RƏŞAD