Əfran İsmayılovun başı imtahanlara və hüzrə qarışıb
"Kəpəz"in Türkiyədəki təlim-məşq toplanışına Əfran İsmayılov, Rauf Əliyev və Elvin Yunuszadə qatılmayıb.
Football-plus.az xəbər verir ki, hər üç futbolçu müqavilədə qeyd olunduğu kimi mövsümün sonuna kimi Gəncə təmsilçisində qalacağını bildirib. Görəsən, onlar "Kəpəz-2"nin hazırlığına qatılıbmı? Bunu aydınlaşdırmaq üçün komandanın baş məşqçisi Xaliq Mərdanovla danışdıq:
"Rauf Əliyevlə Elvin Yunuszadə məşqlərimizə qoşulub. Əfran İsmayılov həm imtahanlarını verir, həm də rəhmətə gedəni var deyə, komandaya bir az gec qoşulacaq. Raufla Elvin hələ yaxşı formada deyil. Amma məşqlərdə var güclə çalışırlar. İnanıram ki, tezliklə formalarını bərpa edəcəklər. Qarşıdakı yoxlama matçlarında onlara da şans verəcəm”.
Təcrübəli mütəxəssis komandanın hazırlıq prosesi və "İmişli"ylə yoxlama oyunu haqda da danışdı:
"Heyətimizdə gənclər çoxdu, onları sınayırıq. Məşqlərdə yüklənmələr olur deyə, yoxlama oyunlarında nəticəyə önəm vermirəm. Əsas hədəf futbolçuların bacarığını üzə çıxarmaqdı. Buna rəğmən, "İmişli"ylə matçda uşaqlar yaxşı oynadı. Hesabda geri düşməyimizə baxmayaraq, 2-ci hissədə xarakter göstərərək oyuna nəzati ələ aldıq və qol vurduq. Bununla məğlubiyyətdən də qurtulduq".
ABDULLA İSMAYILOĞLU
Digər xəbərlər
