Məlum olduğu kimi, Avstriyada təlim-məşq toplanışında olan yığma bizi ilk yoxlama oyununda məyus etdi. Malta ilə üz-üzə gələn əsas komanda 0:2 hesabıyla uduzdu. Halbuki FİFA reytinqində Azərbaycan 124-cü, Malta 162-ci yerdə qərarlaşdığından, qələbə qazanacağımızı düşünənlərin sayı az deyildi. Ancaq gözləntilər özünü doğrultmadı.

Baş məşçi Ayxan Abbasov düz deyir – yığma həqiqətən də xeyli qol vəziyyəti yaratdı. Ancaq topu tora qovuşdurmaq mümkün olmadı. İş ondadı ki, həlledici zərbələrdə dəqiqlik çatmadı. Təsəvvür edin, 20 cəhddən 8-də top, ümumiyyətlə, qapının həndəvərində görünmədi. "Çərçivə" istiqamətində 7 qeyri-dəqiq 5 zərbənin şahidi olduq. Amma 7 zərbə ilə yadda qalan Maltanın "çərçivə"yə gedən 3 zərbəsindən ikisi qolla nəticələndi. Necə deyərlər, keyfiyyət kəmiyyətə qalib gəldi!

Ancaq başqa önəmli məqamlar da var ki, bundan bəhs edilmədi. Belə ki, Malta həm ötürmələrin dəqiqliyində, həm keçidlərdə, həm topa sahibolmada, həm müdafiə planında, həm də intizamlı oyunda bizimkilərdən üstün oldu. Bunu təkcə gözəyarı qiymətləndirmə yox, həm də rəqəmlər deyir. Öz aramızdı, nəyə lazım qolla nəticələnməyən n qədər hücum?!

İndi azarkeşlər yenə haqlı suala cavab axtarır: nəyimiz çatmır? Maddi məsələlərə görə heç kim şikayətlənə bilməz! O başqa məsələ ki, DÇ-2026-da iştirak edəcək Kurasao millisinin avtobusunu görəndən sonra - hər halda, siz də vaxtilə Bakı küçələrində şütüyən PAZ avtobusunu xatırlayırsız. İndi onlardan yalnız bəzi bölgələrdə istifadə olunur. Şəxsən, mən həmin yığmanın avtobusunu PAZ-a bənzətdim - maliyyə məsələsinin heç də ön planda olmadığı bir daha təsdiqləndi.

Hə, bəlkə, cavab verəsiz: nəyiniz çatmır, qardaşlar?

KƏNAN BAHADIR