“Hansısa klubumuzun akademiyasının olduğunu deyə bilmərik”
“Azərbaycanda futbol da var, futbolçu da” deyən Aqil Nəbiyevin çalışdırdığı U-17 yığmamız Fransadan 8 cavabsız top buraxandan sonra İsraildən də 5 qol “yedi”. Amma bu dəfə cavabsız yox.
Bir qol vura bildilər. Belə ki, hər kəsin ilk hissəyə minimal hesablı məğlubiyyətlə gedəcəyimizi düşündüyü anda yeniyetmələr hesabı bərabərləşdirdilər. İkinci hissədə rəqib qapımızdan dörd qol keçirdi.
Əlbəttə, ortada məğlubiyyət varsa, əsas günahkar, daha doğrusu, məsuliyyət sahibi baş məşqçidi. Amma hər şeyi Aqil Nəbiyevin üstünə yıxmayaq. U-17-nin heyətində yer alan futbolçuların hansı komandaların formasını geydiyinə də baxaq.
6 futbolçu “Marset” akademiyasında çıxış edir. Xatırladaq ki, bu akademiya “Barselona”nın nəzdindədi. Yığmanın düşərgəsinə 7 futbolçu “Sabah”dan, 5 futbolçu “Qarabağ”dan gəlib. Bir futbolçu hətta “Qarabağ”ın əsas komandasında ötən mövsümün sonunda debüt də edib. Söhbət Amin Rzayevdən gedir. O Amin ki, İsraillə oyunun son saniyələrində qırmızı vərəqə almaqla Rumıniya ilə bu gün keçiriləcək matç ərəfəsində komandasını çətin vəziyyətdə qoydu.
Təbii ki, hər ölkədə futboldakı uğurların fundamenti uşaq futbolunda qoyulur. Bizdə isə... Əsas milli komanda qara gündədi, aşağı yaş qrupları üzrə yığmalar ondan da betər vəziyyətdədi. Bəs sonumuz hara gedir? Növbəti nəsildən də ümidimizi kəsək? Bu suallar ətrafında “Qarabağ”ın akademiyasının əlaqələndiricisi Aftandil Hacıyevlə danışdıq:
“17 yaş artıq Avropada peşəkar sayılan yaşdı. Bəli, U-17 yığmamızda “Sabah”ın, “Qarabağ”ın, “Marset” klubunun akademiyasının uşaqları coxluq təşkil edir. Ölkədə ümid etdiyimiz uşaqlar burdan çıxır. Bura “Neftçi”, “Qəbələ”, “Zirə” klublarının akademiyasının futbolçularını da daxil edərdim. Amma belə nəticələr ortaya çıxırsa, deməli, daha artığını etməliyik. Əslində hansısa klubumuzun akademiyasının olduğunu deyə bilmərik. Heç bir klubda akademiyaya aid bölümlər yoxdu. Bunlara klubların nəzdində fəaliyyət göstərən məktəb demək daha doğru olar. Hələ ki akademik səviyyəyə çatmamışıq. Buna görə məşqçiləri günahlandırmaq düzgün olmazdı. Problemlər idarəetmə ilə bağlıdı. Yarışları keçirməyə meydançalar tapılmır. Birdən-birə Fransaya qarşı təbii otda oynayanda necə olmalıdı ki? İl ərzində bir dəfə belə şansları olur. Onda da Avropa çempionatına düşməyi tələb etmək sadəlövhlük olar. Buna görə heç kimi günahlandırmıram. Məşqçilərin inkişafını düşünməliyik. Hər şeyə aydın şəkildə baxmalıyıq. Mən iki ildi “Qarabağ” Futbol Klubunun akademiyasının rəhbəriyəm. Gəldiyim gündən rəhbər şəxslərlə - Tahir Gözəllə, Qurban Qurbanovla danışmışam. Hamısı akademiyanın olmasını istəyir. Burda uşaqların gündəlik həyatı da çox vacibdi. Bir çox Avropa ölkələrində klub akademiyası əsas komanda ilə birgə məskunlaşır. Sonuncu dəfə “Benfika” səfərində də bunun şahidi oldum. Uşaq futbolu ilə əsas komanda bir yerdədi. Biz də belə olmasını istəyərdik. Bizə Suraxanıda yer ayrılması daha məqsədəuyğun olar”.
MÜZƏFFƏR QULUZADƏ
Digər xəbərlər
