Dünən Konfrans Liqasının 3-cü təsnifat mərhələsinin cavab görüşündə “Dinamo” üzərindəki qələbədən sonra “Qarabağ”ın müdafiəçisi Bense Varkonyi jurnalistlərin suallarını cavabladı.

- Oyunu necə dəyərləndirirsən?
- Planımız oyunu qazanmaq idi. Bu səbəbdən rəqibə qarşı dominant oyun oynamalıydıq. Bunu tam bacara bilməsək də, qələbə qazandıq.

- 2-ci hissənin əvvəlində müdafiədə bir neçə səhv buraxdız. Bunun səbəbi futbolçularla tam anlaşa bilməməyin idi, yoxsa rəqib güclü idi?
- İlk qolu biz vursaq da, oyun 90 dəqiqə davam eləyir. Sözsüz, səhvlərə yol veririk. “Dinamo” güclü komandadı, ona qarşı müdafiə olunmaq çətindi. Bu gün qapıçımız yaxşı seyvləri ilə seçildi, biz də müdafiədə əlimizdən gələni etdik. Daha inamlı olmalıyıq. Növbəti matçlarda bu səhvləri etməməliyik.

- Növbəti mərhələdə, yəni pley-offda rəqibiniz “Tvente” olacaq. Bu komanda ilə bağlı nə deyə bilərsən?
- “Dinamo”nu məğlub etdiyimizə görə çox xoşbəxtik. İndi isə növbədə çempionat var. Daha sonra rəqibi təhlil etməyə başlayacağıq. Təbii ki qələbə qazanmağı arzulayırıq.

- “Qarabağ”ın bu matçdakı çıxışı ilə “Tvente”ni keçmək olar?
- Bilmirəm. Daha çox çalışmalı və güclənməliyik. Əsas da hücumda və müdafiədə rəqibə daha çox təzyiq yaratmalı, qol fürsəti əldə etməliyik.

- Komanda üç oyun idi qol vura bilmirdi. Bu gün isə həmin tilsim qırıldı…
- İndi addım-addım öz üzərimizdə çalışmalıyıq. Biz ilk oyunu səfərdə keçirəcəyik. Bu səbəbdən bir qədər çətinlik olacaq. Oyunu idarə etməyə çalışacağıq.

- “Qarabağ”a uyğunlaşmısan?
- Mənim üçün çox asan oldu. Hər kəs mənə qarşı mehribandı. Baş məşqçi nəyə ehtiyacım olduğunu başa düşür. Hər kəs xoşbəxtdi. Bu səbəbdən uyğunlaşma prosesi çox rahat oldu.

İSRAYIL XEYRULLAYEV