“Qarabağ”ın polşalı qapıçı Mateus Koxalski bir neçə klubdan ciddi təklif alıb. Bir sıra İngiltərə və Fransa klublarının “radarına düşən” 25 yaşlı qolkiperə Almaniyadan da dəvət gəlib. Hətta onun “Ayntraxt” və Dortmund “Borussiya”sı tərəfindən izləndiyi deyilir.

Bütün karyerasını vətənində keçirən Koxalski 2024-cü ilin yayından “Qarabağ”dadı. Üçillik müqaviləyə imza atan polşalı bu mövsüm özünü tam şəkildə doğruldub. Komandası Çempionlar Liqasında mübarizə apardığına görə Mateus indi daha çox diqqət mərkəzindədi.

Əksər polşalı futbolçunun yolu bundesliqadan keçdiyindən ağdamlıların qapıçısının da eyni addımı atması mümkündü. Lakin “Qarabağ” Koxalskini buraxmaq niyyətində deyil. Klub hələlik rəsmi təklif almayıb, hətta alsa da belə, qolkiperi heyətdə saxlamaq üçün hər şey edəcək.

Mateus “Qarabağ”dakı durumundan məmnundu. Amma Polşa millisinə düşmək arzusu onun Almaniyaya can atmasını şərtləndirə bilər. Böyük klublardan ciddi təklif alacağı və onlar “Qarabağ”ı qane edən transfer haqqını ödəyəcəyi halda yayda onun bundesliqaya yollanacağı deyilir.