“Təbii ki, yetərincə nöqsan, çatışmazlıq, sıxıntı da var”
U-19 yığmamız iyunun 9-dan 11-dək Bakıda, 12-dən 21-dək isə Qəbələdə təlim-məşq toplanışında oldu.
Aqil Nəbiyevin yetirmələri hazırlıq çərçivəsində iki yoxlama görüşü də keçirdi. Komanda iyunun 16-da Gürcüstanın müvafiq yaş qrupu ilə qarşılaşmada 2:1 hesablı qələbə qazandı. Bundan 4 gün sonra isə belaruslu həmyaşıdlarıyla heç-heçəyə nail oldu – 1:1.
"Football-plus.az" olaraq yığmanın təlim-məşq toplanışı, keçirdiyi yoxlama oyunları, futbolçuların hazırlığı və qarşıdakı planlar ilə bağlı Aqil Nəbiyevin fikirlərini öyrəndik: "İki mərhələdən ibarət toplanış keçdik. Əvvəlcə Bakıda, sonra Qəbələdə. Gözlənilməz hal yaşadıq. Heyətə cəlb etdiyim 6-7 futbolçu zədə və digər səbəbdən bizə qoşula bilmədi. Onların yerini doldurmaq üçün digər oyunçulara dəvət göndərdim. Sağ olsunlar, onlar da özlərini yaxşı tərəfdən göstərməyə çalışdılar. İki yoxlama oyunu keçirdik. Öncə Gürcüstan millisini üstələdik, sonra isə Belarusla qollu heç-heçəyə nail olduq. Hər iki oyundan razı qaldım. Söhbət nəticədən getmir. Yetirmələrimin oyuna qoşulması, qarşılıqlı koordinasiyası, hücumda kreativlikləri, müdafiədə ayıq-sayıqlıqları və başqa məsələlərdə inkişaf hiss olunur. Topa sahibolmada, qol imkanları əldə etməkdə də “artırmışıq”. Təbii ki, yetərincə nöqsan, çatışmazlıq, sıxıntı da var. Əsas problem futbolçu seçiminin az olmasıdı. Oyunçuların çoxu U-19 liqasında oynayır. Elitada, demək olar, 17, 18, 19 yaşlı futbolçular oynamır. Futbolçu təzyiq altında oynamadısa, istədiyimiz inkişafı görə bilmirik. Noyabrda Avropa çempionatının seçmə mərhələsinə qoşulacağıq. Rəqiblərimizin heyətinə baxsaq, çoxları elita klublarında oynayır. Onlarla ayaqlaşmaq çətindi. Çox istərdim ki, bizim 17-18 yaşlı perspektivli gənclərimiz premyer-liqada və daha üst liqalarda oynasın. Həmçinin hazırda sərəncamımda olanların beynəlxalq oyun təcrübəsi yoxdu. Bunun da əsas səbəbi odu ki, onlar U-16 və U-17 yığmasında oynadıqları vaxt pandemiya dövrünə düşdü. Nəticədə bir çox beynəlxalq turnirlərdən uzaq qaldılar. Hazırda əsas məqsədim futbolçularda bu çatışmazlığı aradan qaldırmaqdı. Amma ümidliyəm. Yetirmələrim toplanışdan-toplanışa, oyundan-oyuna üzərlərində işləyib “artırırlar”. Ümumilikdə son toplanışdan razı qaldım. Amma hələ də seçmə mərhələyə tam hazır deyilik. Hələ qarşıda müəyyən vaxt var, daha yaxşı hazırlaşmağa çalışacağıq".
ABDULLA İSMAYILOĞLU
Digər xəbərlər
