Bəlkə də bu fikir çoxlarına qəribə gələcək. Ancaq dərindən düşünəndə başqa qənaət üçün əlyeri qalmır.

Bu gün “Liverpul”, “Mançester Siti” və “Arsenal” İngiltərə futbolunda üç əsas gücdü. Bunu həm turnir cədvəlindəki yerə, həm transferlərə, həm də bu komandaların mentallığına görə deyirik. Bu üç klub hər mövsüm titul uğrunda mübarizədə favoritlər sırasında yer alır. Hansısa başqa komandanın onlarla bir sırada dayanması qəribə görünərdi. Ancaq məhz “Çelsi” həmin yerə iddia edə bilər.

Birincisi, “Çelsi” heyətlə bağlı ciddi itkiyə məruz qalmayıb. Feliks, Madueke, Petroviç – heç biri əvəzolunmaz oyunçu deyil. Və əksinə, klub güclənir. Tezliklə Yorell Hato “zadəganlar”ın düşərgəsində olacaq – Kukurelyanın əvəzedicisi kimi gətirilir, bəli, bahadı, ancaq həm də potensialı böyükdü. Hələ Xavi Simonsu da unutmayın. Niderlanddan olan cütlüyə ayrıca yazı həsr etməyə dəyər. Ancaq bir məqam aydındı ki, komanda güclənir, heyəti “dərinləşir”.

İkincisi, 4-cü yer uğrunda mübarizədə “Çelsi” güclü rəqabət hiss etməyəcək. “Nyukasl” “əyləci basıb”: istədiyi bütün oyunçuları (Mbeumo, Joao Pedro, Vissa) başqaları ələ keçirdi, İsakın mümkün gedişi isə bütün komandanı sarsıdacaq. “Aston Villa” birdən-birə üç həlledici oyunçusunu itirə bilər. Uotkins, Rocers və Martines mövsümöncəsi toplanışa qatılsalar da, gedəcəkləri istisna olunmur. “Nottingem Forest” artıq Elanqanın xidmətindən məhrum olub, çətin ki, ötən mövsümdəki qəhrəmanlığı təkrarlaya bilə. “Mançester Yunayted” və “Tottenhem”? Uğursuz mövsümdən sonra yenicə toparlanmağa başlayıblar. Ötən mövsüm 15-ci və 17-ci yeri tutduqlarına görə növbəti mövsüm kəskin yüksəliş yaşayacaqlarına inanmağa dəyməz. Hürtslerin çalışdırdığı “Brayton” yaxşıdı, amma sabit oynamır. Deməli, məhz “Çelsi” ilk “4-lüy”ü qapamağa ən real namizəddi.

Və nəhayət: onu da unutmayaq ki, “Çelsi” artıq tərəqqinin meyvələrini dərməkdədi. Konfrans Liqasında qələbə, klublararası dünya çempionatında zəfər, Çempionlar Liqasına dönüş – bunlar artıq ciddi uğurlardı. Komandanın yenidən bəlli oyun üslubu formalaşıb, ulduzları, pulu, mental möhkəmliyi var. Ağır böhran dönəmindən sonra London klubu identikliyinə qovuşub və indi irəli hərəkət eyməyə hazırdı. Bütün bunlar “Çelsi”ni yaxın bir-iki ildə İngiltərənin dörd klubu sırasında görəcəyimizə ümid verir.

Təbii ki, bütün bunlar subyektiv fikirlərdi. İngiltərə futbolunu yaxından izləyən oxucularımız arasında razılaşmayanlar da tapılacaq. Necə deyərlər, həqiqət mübahisələrdən doğur!