2021/22 mövsümündə olduğu kimi, bu dəfə də Liqa kubokunun finalında “Çelsi” ilə “Liverpul” qarşılaşdı.

"Football-plus.az" xəbər verir ki, Son illərdə bu komandalar həlledici oyunlarda tez-tez üzə gəlir. Elə həmin 2021/22 mövsümündə ölkə kuokunun finalını, 2019-cu ildə UEFA Superkuboku uğrunda oyunu da xatırlamaq olar. Və həmişə də “Çelsi” ilə “Liverpul” işi penalti seriyasına qədər uzadıblar. Elə bu dəfə də qalibin əsas vaxtda müəyyənləşəcəyini gözləməyə dəyməzdi. Ancaq etiraf etmək lazımdı ki, komandalar bu yolda əlindən gələni etdi. Hər iki qapı önündə təhlükəli vəziyyətlərin sayı yetərincə çox idi. Əsas vaxtda vurulan qollardan heç biri qeydə alınmadı. İlk yarıda Sterlinqin, ikincidə isə Van Diykin qolu ləğv olundu. Hansısa komandanın daha üstün olduğunu demək çətindi. Həm “Çelsi”nin, həm də “Liverpul”un yaxşı oynadığı bölümlər oldu. Əlavə vaxtın ilk 15 dəqiqəsini “qırmızılar” yaxşı keçirdi, ancaq qol vura bilmədi. İkinci 15 dəqiqədə isə heç kim risk etmək istəmirdi. Hər kəs fikrən artıq penalti seriyasına hazırlaşırdı. Amma Van Diyk yox! Niderlandlı müdafiəçi Simikasın künc zərbəsindən asmasını tamamlamaqla “qırmızılar”ın çoxsaylı azarkeşlərinə qeyri-adi emosiyalar bəxş etdi. Minimal üstünlüyü ustalıqla qoruan “Liverpul” tarixində 10-cu dəfə Liqa kubokunu qazandı. Klopp “Liverpul”un baş məşqçisi postunda sonuncu mövsümündə titulsuz qalmadı. Onun komandasının cari mövsümdə başqa titullar qazanacağı da istisna olunmur.

final
Çelsi – Liverpul 0:1, əlavə vaxtda
Çelsi: Petroviç, Hüsto, Koluill, Disasi, Çiluell (Çaloba, 113), Fernandes, Kaysedo, Qallaher (Madueke, 97), Palmer, Sterlinq (Nkunku, 67), Cekson (Mudrik, 89).
Liverpul: Kelleher, Bredli (Klark, 72), Konate (Kuansa, 106), Van Diyk, Robertson (Simikas, 87), Makallister (Makkonnell, 87), Endo, Qravenberx (Qomes, 28), Elliott, Qakpo (Danns, 87), Dias.
Qol: Van Diyk, 118.
Vərəqələr: Çiluell, 45+3. Bredli, 45+3. Makallister, 81. Konate, 82. Makkonnell, 107. Palmer, 120+2. Qomes, 120+3 – sarı.
Hakim: Kris Kavana.
25 fevral. London. “Uembli” stadionu. 88868 tamaşaçı.

Fakt
* “Çelsi” İngiltərə futbolu tarixinə ölkədaxili kubok turnirlərində ardıcıl 6 dəfə uduzan ilk komanda kimi düşdü. Son üç məğlubiyyət “Liverpul”la duellərdə qeydə alınıb. “Zadəganlar” buna qədər bu rəqibə 2022-ci ildə həm Liqa (0:0, p. – 10:11), həm də ölkə kubokunun (0:0, p. – 5:6) finalında uduzmuşdu. Qalan məğlubiyyətlər – 2019-da Liqa (“Mançester Siti” - 0:0, p. – 3:4), 2020-də (“Arsenal” – 1:2) və 2021-də (“Lester” – 0:1) isə ölkə kubokunun finalında qeydə alınıb.
* Liqa kubokunu 10-cu dəfə qazanan “Liverpul” daha 4 finalda uduzub. MS-nin 8, MY-nin 6 belə titulu var. Klopp məşqçi karyerasında 13-cü, “Liverpul”la 8-ci titulunu qazandı.
* “Çelsi” 2021-ci ilin martından bəri, yəni 9 oyundu “Liverpul”a qalib gələ bilmir. O vaxtan bəri keçirilən oyunlarda “qırmızılar” 4 qələbə qazanıb, daha 5 oyun heç-heçə bitib.

Reaksiya
Yergen Klopp, “Liverpul”un baş məşqçisi: “Burda başverənlər tam ağılsızlıqdı, belə şeylər mümkünsüzdü. Komanda xarakter göstərdi. Bu işin bir parçası olmağımla qürur duyuram. Bəzi məqamlarda bizim bəxtimiz gətirdi, bəzi məqamlarda rəqibin. Bizə yeni oyunçular lazım idi, onlar da işinin öhdəsindən gəldi”.