“Çelsi” transferlərdən doymur. Mövsümün gedişində zədə sindromu yaşayan London klubunun rəhbərliyi bunun əvəzini yanvarda yeni oyunçuların keçidlərini sıralamaqla çıxmaqdadı.

Noni Madueke də artıq “zadəganlar”ın sıralarındadı. PSV-nin vingeri paytaxt klubuna 35 milyon avroya başa gəlib. 20 yaşlı futbolçu ilə 7,5 illik müqavilə bağlansa da, müddət sonradan birilliyə artırıla bilər. “Kristal Pelas” və “Tottenhem”in yetirməsi sayılan Madueke PSV-yə 2018-ci ilin yayından qoşulmuşdu. Bu komandada keçirdiyi 80 oyunda 20 qol vuran Noni 14 məhsuldar ötürmə verib.

“Çelsi” bu keçidlə transfer sahəsində rekorda nail olub. Londonlular artıq cari mövsümdə yeni oyunçuların alğısına 372 milyon funt sterlinq xərcləyiblər. Maraq üçün qeyd edək ki, paytaxt klubu əvvəlki sahibi Roman Abramoviçin dövründə bu planda 2017/18 mövsümündə maksimum 290 milyon funt sterlinq xərcə düşmüşdü. Həmin mövsüm “Mançester Siti” transfer əməliyyatları üçün 328 milyon funt sterlinq sərf etmişdi. Başqa sözlə, “Çelsi” artıq İngiltərədə mövsüm üzrə transfer xərclərinə görə yeni rekordçudu! “The Swiss Ramble” portalının yaydığı məlumata görə, 372 milyon funt sterlinq heç də “Çelsi”nin bütün xərclərini əhatə edən göstərici deyil: londonluların aldığı oyunçuların müqaviləsində göstərilən bonusların ümumi məbləği 51 milyon funt sterlinqə bərabərdi. Əlavə edək ki, klub Joao Feliş ilə Denis Zakariyanın icarəsinə görə 10 milyon funt sterlinq xərcə düşüb.

“Transfermarkt” portalının son məlumatı da diqqəti cəlb edir. “Çelsi”nin hazırkı heyətini təşkil edən futbolçuların ümumi transfer dəyəri 1,02 milyard avroya bərabərdi. Paytaxt təmsilçisi bu planda dünyada yalnız MS-dən geri qalır. İngiltərənin son çempionu oyunçularının ümumi qiyməti 1,11 milyard avrodu. Dünya futbolunda bu göstəricidə ilk “10-luğ”a daxil olan klubların siyahısını nəzərinizə çatdırırıq.

1. Mançester Siti 1,11 milyard
2. Çelsi 1,02 milyard
3. Bavariya 944,7 milyon
4. Liverpul 928 milyon
5. PSJ 894,55 milyon
6. Real 894 milyon
7. Arsenal 789 milyon
8. Barselona 777 milyon
9. Mançester Yunayted 742,1 milyon
10. Tottenhem 688,3 milyon

Yeri gəlmişkən, Moyses Kaysedo da tezliklə “Çelsi”nin formasında görünə bilər. Klubun yarımmüdafiəçi ilə razılığa gəldiyini bildirən jurnalist Nikolo Skira ekvadorluya görə “Brayton”a 65 milyon avro təklif edildiyini də xəbər verib.