“Midlsbro” ilk oyunda qələbə qazandığından bu cütün qalibin kim olacağı ilə bağlı müəyyən şübhələr var idi.

"Football-plus.az" xəbər verir ki, ancaq “Çelsi” cavab görüşündə rəqibi darmadağın etməklə səviyyəcə ondan aşkar üstün olduğunu göstərdi. “Midlsbro” yalnız debütdə inamlı göründü, tezliklə meydan sahibləri təşəbbüsü ələ keçirdi. Artıq 15-ci dəqiqədə hesab açıldı. Broya topu rəqib qapısına göndərmək istəyərkən Houson müdaxilə etdi və avtoqol müəllifi oldu. Qonaqlar bir müddət də təzyiqə davam gətirdi. Ancaq Fernandesin 2-ci qolundan sonra Kerrikin komandası pərən-pərən düşdü. Tezliklə Disasi əks-hücumda fərqi darmadağın həddinə çatdırdı, ardından Palmer fərqləndi. Artıq ilk yarının sonunda hər şey aydın idi, komandalar 2-ci hissəyə çıxmaya da bilərdi. Hərçənd “zadəganlar” 4-cü qoldan sonra da dayanmadılar. 5-ci qol 77-ci dəqiqədə Palmerdən gəldi. 4 dəqiqə sonra Madueke də Qloveri məyus etdi. Hər halda, “Boro” “quru” hesabla uduzmadı. Qonaqlar 6 dəqiqə ərzində iki dəfə fərqləndi. Kruskun qolu ofsayd üzündən sayılmasa da, Rocers qaydalar çərçivəsində qol vurdu. İki oyunun nəticəsinə görə 6:2 hesabıyla qalib gələn “Çelsi” son üç ildə 2-ci dəfə Liqa kubokunun finalına vəsiqə qazandı. 2022-də “Liverpul”a penalti seriyasında uduzan “zadəganlar” bu titulu sonuncu dəfə 2015-də qazanıb. Ümumiyyətlə, onlar bu kuboku 5 dəfə muzeyinə aparıb. Daha bir maraqlı statistika var. “Çelsi” 2000-dən bəri 18-ci dəfə ölkədaxili turnirlərdə finala adlamaqla özünə məxsus olan rekordu bir qədər də yaxşılaşdırdı. “Mançester Yunayted” bu müddətdə 12, “Arsenal” isə 11 dəfə finalda oynayıb.

yarımfinal, cavab görüşləri
Çelsi – Midlsbro 6:1 (ilk oyun – 0:1)
Houson, 15-öz qapısına. Fernandes, 29. Disasi, 36. Palmer, 42; 77. Madueke, 81 – Rocers, 88.
Çelsi: Petroviç, Disasi, Silva, Koluill, Çiluell (Gilkrist, 65), Kaysedo (Çukvuemeka, 72), Fernandes, Sterlinq (Kasldayn, 85), Palmer, Mudrik (Madueke, 46), Broya (Qallaher, 65).
Fulhem – Liverpul 1:1 (1:2)
Diop, 77 – Dias, 11.

Reaksiya
Maurisio Poçettino, “Çelsi”nin baş məşqçisi: “Hansısa mənada möhtəşəm nəticədi. Avrokuboklarda çıxış etmədiyimizə görə Liqa kubokunda finala çıxmaq ilk gündən hədəfimiz idi. Komandanı praktiki cəhətdən sıfırdan yığdıq, fevralda “Uembli”də olmağa can atırdıq. Bu vəzifə yerinə yetirildi. İndi söhbət finalda qələbə qazanmaqdan gedir. Komandanın özünəinam qazanması baxımından vacib addım atdıq. Finala vəsiqə futbolçulara əlavə motivasiya verəcək. Finala görə onlar elə sabah məşqə çıxmaq istəyirlər! Bəli, mən də titul qazanmaq arzusu ilə alışıb-yanıram. Parisdə üç titul qazana bildim, burda da qazanmaq istəyirəm. Özü də çox”.