“Dünyanın bütün liqalarında hər komanda 5-6 turluq enişə gedir”
Misli premyer-liqasının 16-cı turunda “Sabah” “Səbail”i qəbul edib - 4:0.
“Football-plus.az” xəbər verir ki, matçdan sonra qonaqların çalışdırıcısı Şahin Diniyevin mətbuat konfransı keçirilib. Sizi onun fikirləri ilə tanış edirik:
"Oyun haqda geniş danışmaq istəmirəm. Hər bir komponentdə “Sabah”a uduzduq. Komanda meydana çıxanda sanki artıq hazır deyildi, qorxurdu. Durum o yerdədi ki, qalan oyunları birtəhər yola verməliyik. “Turan Tovuz”la matçdan sonra böyük problemlərimiz var. Oyunçu qıtlığını deyirəm. Artıq üçüncü oyunçumuz əməliyyata yollanacaq. Rotasiya üçün böyük heyətimiz yoxdu. Problemlərimiz çoxdu. David Qomis də olmayacaq. İki oyunu başa vurmalıyıq. Yəqin ki, transferlər edəcəyik. 16 turda ilk dəfə idi ki, birinci hissəni belə keçirirdik. Heç vaxt belə olmamışdı. Komandadan, nəticədən və oyunumuzdan narazıyam. Futboldu da, dünyanın axırı deyil ki. Hər komandada eniş olur. Bizdə də həmin eniş gedir. İki oyunu uğurla başa vurmaq istəyirik. 4-5-ci yerlərdəyik. Artıq ehtiyatımız qalmayıb. İtkilərə baxmayaraq, qarşıdakı iki oyuna və kubok matçına hazırlaşmalıyıq".
- Komandanın belə duruma düşəcəyini ehtimal edirdiz?
- “Turan Tovuz”la matçdan sonra itkilərimiz var. Rotasiya üçün oyunçumuz yoxdu. İki Qomis, iki Pedro, iki Ramalinqomumuz yoxdu. Gözləyirdim ki, nə vaxtsa komanda enişə gedəcək. Çox çətin durumdayıq. Dünyanın axırı deyil. Bütün bunlara baxmayaraq, biz heç nədən əl çəkmirik. Həmişə sözümü tutan adam olmuşam. Yanvardan sonra daha yaxşı “Səbail” görəcəksiz. Sadəcə çempionatın son iki oyununu uğurlu başa vurmalıyıq ki, yanvardan sonra həmin yerdə qalaq. Fasilədən sonra yaxşı yerlərə gedib çıxacağıq.
- Yeni transferlər axtarışlarına başlamısız? Danışıqlar var?
- Var. İndiki halda çox çətindi yaxşı futbolçu tapmaq. Seleksiya şöbəsi var, hər gün 3-4 oyunçuya baxırıq. Bizə uyğun oyunçu olmalıdı. Bu gün 2-3 mövqeyə futbolçu axtaracağıq ki, səhv etməməliyik. İki oyunçu götürüb, birində səhv edəcəyiksə... 20-30 faiz itki deyil, amma 50 faiz böyük itkidi. David Qomisin sıradan çıxması transfer məsələlərini daha da aktivləşdirməyimizə səbəb olacaq.Çalışacağıq ki, ən yaxşılarını seçək.
- Paltardəyişmə otağında futbolçularla danışığınız daha çox çəkdi. İradlarınız var idi, yoxsa oyunçuları motivasiya edirdiz?
- Hər ikisi var idi. Dünyanın bütün liqalarında hər komanda 5-6 turluq enişə gedir. Hansı komandanın ehtiyat skamyası genişdisə, enişdən minimum itki ilə çıxacaq. Futbolçulara sakitləşmələrini xahiş etdim. Maksimum iki oyunumuz qalıb. Ona hazırlaşmalıyıq. Bu oyunları yüksək səviyyədə keçirməliyik ki, məğlubiyyət unudulsun. Bu məğlubiyyət də unudulacaq. Dözməli və səbr etməliyik. Təzyiqlərə tab gəlməliyik. Təcrübəmiz, təmkinimiz çatacaq ki, bu üç oyunu yaxşı nəticə ilə keçirək. Dedimsə, demək belə olacaq.
- David Qomisin durumu hansı yerdədi?
- İlkin məlumat odu ki, çarpaz bağları qopub. Amma sabah MRT müayinəsindən sonra dəqiq bilinəcək.
Digər xəbərlər
