Fransa çempionatının son turu ilə bağlı xüsusi intriqa yox idi. Vaxtından əvvəl çempionluğu təmin edən PSJ evdə “Klermon”a uduzdu. Bu, Messi, Ramos və Qaltye üçün Paris klubunda son oyun idi. “Lans” liderdən cəmi 1 xal geri qaldı.

"Football-plus.az" xəbər verir ki, “qan-qızılılar” “Oser”i məğlub etməklə aşağı dəstəyə göndərdi. Turnirin əsas autsayderi “Anje”yə qalib gələn “Nant” elitada yerini qorudu.

Mövsümün digər uğursuzları “Trua” ilə “Ayaçço”du. Bürünc medalçı “Marsel”i məğlub edən korsikalılar elitanın qapısını möhkəm çırpdı. 4-cü yer uğrunda da gərgin mübarizə getdi. “Renn” səfərdə “Brest”in öhdəsindən gəldi, “Lill” isə “Trua” ilə oyunda büdrədi. Beləcə bretoniyalılar finişdə “şimallı itlər”i qabaqlamaqla Avropa Liqasına vəsiqə qazandı. “Lill” isə Konfrans Liqasında oynayacaq. “Monako”, ümumiyyətlə, avrokuboklardan kənarda qaldı. Artıq istefaya göndərilən Filipp Klemanın komandası evdə “Tuluza”ya uduzmaqla 6-cı yerdə qaldı.

PSJ son turda “Klermon”u qəbul etdi. İyulun 1-dən azad agent olacaq Messi ilə Ramos sonuncu dəfə Paris klubunun formasında meydana çıxmışdı. Baş məşqçi Kristof Qaltye də gedir. ÇL-i boşa verən, ölkə kubokunda 1/8 finalda dayanan, çempionluğu çətinliklə qazanan komandada belə dəyişikliklər təbiidi. Əsas məqam budu ki, PSJ-nin oyunu da ürəkaçan deyil. Konkret bu oyuna gəlincə, artıq 21-ci dəqiqədə 2:0 önə çıxan PSJ dayandı. Yeri gəlmişkən, PSJ-nin futbolçuları Serxio Rikonun üzləşdiyi bədbəxt hadisə üzündən qolları qeyd etmirdi. 29 yaşlı qapıçı at sürərkən yıxılıb və hazırda reanimasiyadadı. 24-cü dəqiqədə Ramosun kobud səhvindən yararlanan Qastyen fərqi azaltdı. Qarşılıqlı hücumlar şəraitində davam edən oyunun 37-ci dəqiqəsində qonaqlardan Kiey penaltini boşa verdi. Bununla belə, ilk yarının uzatma dəqiqələrində hesab bərabərləşdi. Bu dəfə Donnarummanın çıxışda səhvindən Zeffan yararlandı. 2-ci hissədə isə meydan sahibləri hücum etdi, ancaq qolu “Klermon” vurdu. 63-cü dəqiqədə Kiey penaltiyə görə günahını yudu. PSJ sonda hücum dalğası təşkil edə bilmədi.

“Lans” mövsümü möhtəşəm keçirdi. Frank Hayzın komandası son turda elitada qalmaq uğrunda mübarizə aparan “Oser”ə rəhm etmədi. Burqundiyalılar bu tur ərəfəsində “Nant”ı qabaqlamaqla xilaskar 16-cı yerdə idi. “Bülbüllər” paralel keçən oyunda mövsümün əsas autsayderi “Anje” ilə qarşılaşırdı. “Oser” yalnız özünə bel bağlaya bilərdi, ancaq “Lans” çox güclü idi. 19-cu dəqiqədə hesabı açan Klod-Moris 2-ci hissənin əvvəlində daha bir qol vurdu. 71-ci dəqiqədə Nyanq intriqanı bərpa etsə də, ardından Openda mövsümdə 21-ci dəfə fərqlənməklə oyunun taleyini həll etdi.

Paralel keçən oyunda “Nant” “Anje”nin öhdəsindən gəldi. “Anje” və “Oser”lə yanaşı, “Ayaçço” və “Trua” da elitadan ayrılır, ancaq bu əvvəldən bəlli idi. Korsikalılar mövsümün son oyununda “Marsel”ə qalib gəldi. Böyük üstünlüyə malik olan cənublular Leruanın qapısına heç cür yol tapa bilmədi. “Ayaçço” isə “çərçivə”yə bir zərbə vurdu ki, o da qolla nəticələndi.

Mövsümboyu qeyri-sabit oyun göstərən “Monako” bir ara qələbə seriyası sayəsində hətta ÇL-ə vəsiqəyə ümid etsə də, sonluq hər şeyi yerinə qoydu. Evdə “Tuluza”ya uduzan “knyazlar” avrokuboklarda olmayacaq. Kubokun son sahibi qələbə topunu 3-cü uzatma dəqiqəsində vurdu.
“Lill” son tur ərəfəsində “Renn”i 1 xal qabaqlayırdı. “Şimallı itlər” autayderlərdən “Trua” ilə heç-heçə (1:1) etməklə “Renn”in “çörəyinə yağ sürtdü”. Burijonun dublu sayəsində “Brest”i məğlub edən bretoniyalılar Avropa Liqasının qrupuna vəsiqə qazandı. “Lill” isə Konfrans Liqasının təsnifat mərhələsində oynayacaq. Turun qalan oyunlarına gəlincə, “Loryan” “Strasbur”u məğlub etdi. “Nitsa” – “Lion”, “Reyms” – “Monpelye” oyunlarında eyni hesab (3:1) qeydə alındı. Sadəcə, birincidə meydan sahibləri, ikincidə qonaqlar qalib gəldi.

38-ci tur
PSJ – Klermon 2:3
Ramos, 16. Mbappe, 21-p. – Qastyen, 24. Zeffan, 45+1. Kiey, 63. (47926)
PSJ: Donnarumma (Letelye, 80), Pereyra (Qarbi, 90), Ramos, Bitşiabu (Markinyos, 80), Hakimi, Vitinya (Sanşeş, 57), Verratti, Zair-Emeri, Messi, Mbappe, Ekitike (Soler, 57).

Oser – Lans 1:3
Nyanq, 71 – Klod-Moris, 19; 48. Openda, 78. (17246)
Lans: Leka, Aydara, Danso (Onana, 65), Qradit, Frankovski, Əbdül Səməd, Klod-Moris (Said, 65), Maçado (Le Kardinal, 79), Tomasson, Füljini (Sotoka, 65), Openda (Buksa, 79).

Ayaçço – Marsel 1:0
Vidal, 88. (9500)
Marsel: Blanko (Lopes, 46), Kolaşinats, Balerdi (Beyi, 64), Mbemba, Ündər, Malinovski (Muqe, 80), Veretu, Kloss (Tavareş, 64), Kabore, Genduzi, Sançes (Vitinya, 64).

Brest – Renn 1:2
Belkebla, 36-p. – Burijo, 13; 45+4-p. (15143)
Renn: Ələmdar, Belosyan (Melinq, 79), Rodon, Omari, Traore (Assinyon, 86), Burijo (Uqoçukvu, 89), Santamariya, Mayer, Toko-Ekambi (Due, 86), Quiri, Dokyu (Kalimuendo, 86).

Trua – Lill 1:1
Lopeş, 72 – Diakite, 52. (11006)
Lill: Şevalye, Qudmundsson (Vea, 48), Aleksandro, Fonte, Diakite, Qomes (Baleba, 81), Andre, Ünas (Jeqrova, 73), Kabella (Bayo, 90), Bamba, Devid.

Monako – Tuluza 1:2
Ben Yedder, 78 – Abuhlyal, 71. Hili, 90+3. (5670)

Loryan – Strasbur 2:1
Fevr, 10; 36 – Belqard, 57. (16351)

Nant – Anje 1:0
Qanaqo, 16. (27650)

Nitsa – Lion 3:1
Boatenq, 5-öz qapısına. Lyabord, 28. Moffi, 33 – Jefinyo, 41. (25243)

Reyms – Monpelye 1:3
Baloqun, 28 – Vai, 54; 76. Nordin, 59. (15036)

Yekun cədvəl

1. PSJ 38 27 4 7 89-40 85
2. Lans 38 25 9 4 68-29 84
3. Marsel 38 22 7 9 67-40 73
4. Renn 38 21 5 12 69-39 68
5. Lill 38 19 10 9 65-44 67
6. Monako 38 19 8 11 70-58 65
7. Lion 38 18 8 12 65-47 62
8. Klermon 38 17 8 13 45-49 59
9. Nitsa 38 15 13 10 48-37 58
10. Loryan 38 15 10 13 52-53 55
11. Reyms 38 12 15 11 45-45 51
12. Monpelye 38 15 5 18 65-62 50
13. Tuluza 38 13 9 16 51-57 48
14. Brest 38 11 11 16 44-54 44
15. Strasbur 38 9 13 16 51-59 40
16. Nant 38 7 15 16 37-55 36
17. Oser 38 8 11 19 35-63 35
18. Ayaçço 38 7 5 26 23-74 26
19. Trua 38 4 12 22 45-81 24
20. Anje 38 4 6 28 33-81 18

Bombardirlər: Mbappe (PSJ) - 29, Lakazett (Lion) - 27, Devid (Lill) - 24, Baloqun (Reyms), Openda (Lans) – 21.

Faktlar
* İki dəfə çempion olan və Fransa Superkubokunu qazanan Messi cari mövsümdə bütün turnirlərdə 21 qol vurub, 20 məhsuldar ötürmə verib. Ümumilikdə PSJ-nin heyətində keçirdiyi 75 oyunda 32 qol və 35 ötürmə ilə yadda qalıb. Cari mövsümdə çempionatda keçirdiyi 33 oyunda 16 qol vuran və 16 məhsuldar ötürmə verən argentinalı 2-ci göstəricidə hamını qabaqladı. Onun ən yaxın izləyiciləri hərəyə 11 ötürmə ilə həmklubu Neymar və “Marsel”dən Klossdu.
* Mbappe ardıcıl 5-ci dəfə Fransa çempionatının bombardiri oldu.

Turun rəqəmi
24 – PSJ başa çatan mövsümdə ev oyunlarında bu qədər qol buraxıb. Bu isə parislilər üçün 1984/85 mövsümündən bəri ən pis göstəricidi. Həmin mövsümdə PSJ-nin rəqibləri “Park de Prens”də 28 qol vurmuşdu.

Turun ulduzu
Benjamen Burijo (Renn) – dubl edən təcrübəli yarımmüdafiəçi komandasının cari mövsümü 4-cü yerdə bitirməsində önəmli rol oynadı. Onun hesabında 10 məhsuldar ötürmə də var.

Turun sitatı
Neymar, PSJ-nin hücumçusu (Messinin gedişi ilə bağlı): “Qardaş, düşündüyümüz kimi alınmadı. Ancaq biz hər şeyi sınadıq. Daha iki ili səninlə paylaşmaq xoş idi. Yeni mərhələdə uğurlar, xoşbəxt ol. Mən səni sevirəm”.