Hesabat turunda aşkar autsayder “Anje”nin qonağı olan PSJ heç də asan qələbə qazanmadı.

Paytaxt klubunun köməyinə dubl edən Mbappe çatdı. Hesabıbda 75 xal olan PSJ ən yaxın izləyicisindən 8 xal irəlidədi. 2-ci pillədə hələ ki “Marsel” qərarlaşıb. İki “Olimpik”in duelindən “Lion”u səfərdə məğlub edən cənublular qalib ayrıldı. “Monako” üzərində çox önəmli qələbə qazanan “Lans” “Marsel”i addım-addım izləyir. “Avrokubok zonası”na düşmək uğrunda mübarizə aparan “Lill” ilə “Renn”in büdrəməsini də qeyd etməliyik. “Oser”in qonağı olan “şimallı itlər” 36-cı dəqiqədə Devidin penalti qolu sayəsində hesabı açdısa, 62-ci dəqiqədə də onların qapısına penalti təyin olundu.

“Lill” 55 xalla 5-ci pillədəki yerini qorudu. Səfərdə “Monpelye” ilə qarşılaşan “Renn” Mavididinin 84-cü dəqiqədəki qələbə topuna mane ola bilmədi. Halbuki “Monpelye” 53-cü dəqiqədən azlıqda oynayırdı.

Turun qalan oyunlarına gəlincə, “Reyms” gözlənilmədən evdə “Strasbur”a uduzdu. “Nitsa”nın “Klermon” önündəki məğlubiyyətini də sürpriz kimi qiymətləndirmək olar. “Nant” ilə “Trua”nın duelində məhsuldar, “Ayaçço” ilə “Brest” arasında isə qolsuz heç-heçə qeydə alındı. “Tuluza” səfərdə “Loryan” üzərində qələbə qazandı.

Turun rəqəmi
157 – Liqa 1-də qol sayını bu həddə çatdıran Mbappe bu turnirin bombardirləri siyahısında 16-cı pilləyə yüksəldi. O, Fransa çempionatının rekordçusu olmaq üçün daha 142 qol vurmalıdı. Rekordçu 299 topla Delio Onnisdi.

Turun ulduzu
Loi Openda (Lans) – gözlənilmədən ən yüksək hədəflər uğrunda oynayan komandanın əsas ulduzudu. Cari mövsümdə artıq 17 qol vuran belçikalı hücumçu bir çox qitə nəhənginin transfer siyahısındadı. “Monako” üzərindəki qələbəyə 2 qol və məhsuldar ötürmə ilə töhfə verdi.

Faktlar
* Mbappenin 2-ci qoluna şərait yaradan Messi cari mövsümdə Liqa 1-də “qol+ötürmə” sistemi üzrə 30 (15+15) xal toplayıb və bu göstəricidə liderdi.
* Messi 21-ci əsrdə Liqa 1-də mövsüm ərzində 15 ötürmə həddinə hamıdan tez çatıb. Özü də argentinalı buna 27 oyun keçirməklə nail olub. Bundan başqa, Messi 2006/07 mövsümündən bəri Eden Azar və Mbappedən sonra Liqa 1-də 15 qol vuran və eyni sayda məhsuldar ötürmə verən üçüncü oyunçudu.
* Mbappe Liqa 1-in məhsuldar hərəkətlər üzrə rekordunu təkrarlayıb. Onun hesabında 157 qol və 57 ötürmə var. “Qol+ötürmə” sistemi üzrə 214 xal “Opta”nın müvafiq statistikanı apardığı 2006/07 mövsümündən bəri müəyyənləşən rekordun təkrarıdı. “Marsel”dən Dimitri Payet də bu müddətdə eyni sayda məhsuldar hərəkət edib.