İyulun 23-də bir həftəlik toplanış üçün Avstriyaya yola düşən ''Qalatasaray'' dünən burda ilk, bu yayın ikinci yoxlama oyununu keçirib.

Türkiyə çempionu Lints şəhərində yerləşən ''Rayffayzen Arena''da İtaliya təmsilçisi ''Montsa'' ilə qarşılaşıb. ''Cim-Bom'' oyuna bu ''11-lik''lə çıxıb: Günay Güvənç, Yelert, Arda Ünyay, Nelsson, Kazımcan Karataş, Uqoçukvu, Nyaqa, Can Günər, Sara, Şallai, Ada Yüzgeç. İkinci hissənin gedişində Osimhen, Torreyra, İlkay Gündoğan, Kaan Ayhan kimi önəmli isimlər meydana çıxsa da, oyun ''Qalatasaray'' üçün uğursuz alınıb.

Bu yayın ilk yoxlama oyununda 1-ci liqa təmsilçisi ''Ümraniyəspor''u 5:1 darmadağın edən İstanbul nəhəngi bu dəfə nəinki qələbəyə, hətta qola da həsrət qalıb. A seriyasının debütantı 23-cü dəqiqədə Andrea Karboni və 49-cu dəqiqədə Patrik Kutronenin qolları ilə 2:0 hesablı inamlı qələbə qazanıb. ''Sarı-qırmızılar''ı dəstəkləməyə gələn 6 minə yaxın qürbətçi azarkeş stadionu məyus tərk edib.

''Qalatasaray'' Avstriyada sonuncu yoxlama oyununu iyulun 27-də A seriyasının digər debütantı ''Venetsiya''ya qarşı keçirəcək. Mövsümün startına qədər Okan Burukun komandasını avqustun 2-də ''Renn'', avqustun 8-də isə ''Vilyarreal'' ilə görüşlər də gözləyir.