''Beşiktaş''ın uzun müddətdi, gündəmdə saxladığı və danışıqlar apardığı Məhəmməd Salahın transferi mövzusunda yeni xəbər var.

Bilindiyi kimi İstanbul nəhəngi misirli ulduzun özü ilə artıq anlaşıb. Salah ikiillik müqavilə və illik 12 milyon avro maaş şərtlərini qəbul edib. Keçidə mane olan asis amil təcrübəli vingerin meneceri Remi Abbasın tələb etdiyi astronomik komissiya haqqı idi. Amma Türkiyə mənbələrinin yazdığına inansaq, Abbas 7,5 milyon avrodan 5 milyon avroya qədər enməyə razı olub. Bu üzdən danışıqlar prosesi bir xeyli irəliləyib. Artıq klubun təklifi ilə menecerin tələbi arasında fərq çox azalıb və tərəflərin qısa müddətdə anlaşacağı gözlənilir.

Müqavilədə ayrı-ayrı bir çox maddələr, bonuslar var. Ona görə də sənədlərin hazırlanması və bir-bir imzalanması prosesi bir qədər yubana bilər. Danışıqlarda ''Beşiktaş'' adından birbaşa prezident Sərdal Adalı və vitse-prezident Murat Kılıç iştirak edir.

Bu arada ''Beşiktaş''ın sabiq misirli futbolçusu Ahmed Hassan son paylaşımı ilə diqqət çəkib. Stajlı fanatların gözəl xatırladığı Hassan hekayə bölümündən ''anlaşma tamamlandı, bir neçə saat ərzində rəsmən açıqlanacaq'' ifadəsini paylaşıb.