Bakıda Avropa Cüdo Ümidləri turniri keçirilib.

“Football-plus.az” xəbər verir ki, yarış zamanı 10 ölkədən 81 klubdan 289 idmançı gücünü sınayıb. Avropa Cüdo Birliyinin İdman Komisarı, Olimpiya mükafatçısı Rüstəm Orucov jurnalistlərin suallarını cavablandırıb:

-Buradakı təşkilatçılığı necə qiymətləndirirsiniz?
-Bildiyiniz kimi, biz Avropa Cüdo Federasiyasının adından buraya gəlmişik. Gördüyünüz təşkilatçılıq çox yüksək səviyyədədi. Mən çox yarışlarda iştirak etmişəm, amma belə yüksək səviyyəli təşkilatçılıq çox nadir hallarda olur. Bu yarışın əsas məqsədi gənc idmançıların təcrübə qazanmasıdı.
-Bu turnir məşqçilər üçün hansı imkanları yaradır?
-Bu yarış həm də klub məşqçiləri üçün yaxşı bir fürsətdi. Onlar burada məşqçi kimi iştirak edərək öz təcrübələrini artırırlar.
-Veteran cüdoçu kimi bizim idmançılardan hansı nəticəni gözləyirsiniz?
-Əlbəttə ki, bizim uşaqlardan qızıl medal gözləyirəm. Gördüyünüz kimi, bizim idmançılar genetik olaraq da çox güclüdürlər və rəqabətə hazırdırlar.
-Bu turnir medaldan əlavə idmançılara nə qazandırır?
-Medaldan əlavə ən vacib qazanc təcrübədir. Bildiyiniz kimi, bu yarışa iki mütəxəssis dəvət olunub — biri Yaponiyadan, digəri İtaliyadan. Yaponiyadan gələn mütəxəssis üçqat dünya çempionu və Olimpiya mükafatçısıdı, İtaliyadan gələn isə Olimpiya mükafatçısıdı. Onlar burada uşaqlar üçün master-klasslar keçirəcəklər. Bu isə idmançıların inkişafı üçün çox önəmlidi. Məncə, belə tədbirlərin keçirilməsi çox vacibdi.
İSRAYIL XEYRULLAYEV