Bakıda Avropa Cüdo Ümidləri turniri keçirilib.

“Football-plus.az” xəbər verir ki, yarış zamanı 10 ölkədən 81 klubdan 289 idmançı gücünü sınayıb. Azərbaycan Cüdo Federasiyasının Prezidentinin Müşaviri Natiq Bağırov jurnalistlərin suallarını cavablandırıb:

- Bu turnirin əhəmiyyəti haqqında nə deyə bilərsiniz?
- Bu turnirin çox böyük əhəmiyyəti var. İlk növbədə gənc judocular burada öz ilk beynəlxalq təcrübələrini qazanırlar. Onu da qeyd etmək istərdim ki, keçən il bu yarışda qalib gələn tələbələrimizdən biri yeniyetmələr arasında keçirilən Avropa Birinciliyində gümüş medal qazanıb. Bundan əlavə, bu yarış çərçivəsində müxtəlif ölkələrdən gəlmiş judo mütəxəssisləri və məşhur idmançılar bizim idmançılara yeni fəndlər öyrədir, tatami üzərində düzgün hərəkət etməyi aşılayırlar. Gənc idmançılar tanınmış idmançılarla görüşür, onlardan motivasiya alırlar və anlayırlar ki, gələcəkdə onlar da Avropa və dünya çempionu, həmçinin Olimpiya mükafatçısı ola bilərlər.
- Yarışa qatılan digər ölkələrin idmançıları haqqında nə düşünürsünüz? Onların səviyyəsi necədi?
- Sualınıza görə təşəkkür edirəm. Bu yarışda 10 ölkədən, təxminən 88 klubdan 300-ə yaxın idmançı iştirak edir. İnanıram ki, ildən-ilə müxtəlif ölkələrdən gələn iştirakçıların sayı daha da artacaq. Onu da qeyd edim ki, xarici idmançılar kifayət qədər güclüdülər və onların səviyyəsini ən yaxşı tatami göstərəcək.
- Sizcə, neçə ildən sonra bu gənclər arasında Avropa çempionu görə bilərik?
- Bu, həm idmançılardan, həm də məşqçilərdən çox asılıdı. Hazırda biz U-14 və U-16 yaş kateqoriyaları üzrə yarışlar keçiririk. Bildiyiniz kimi, Avropa Birinciliyi əsasən U-17 və daha sonra U-21 yaş qruplarında təşkil olunur. Keçən il U-13 və U-15 yaş qruplarında təşkil etdiyimiz turnirdən sonra artıq bir il ərzində idmançımız Fərid Avropa Birinciliyində gümüş medal qazandı. Buna görə də düşünürəm ki, 1–2 il ərzində idmançılarımızdan daha böyük uğurlar gözləmək mümkündü.
İSRAYIL XEYRULLAYEV