Fransa çempionatı tədricən finiş xəttinə yaxınlaşır. İndi hər xal itkisi sonda komandalara baha başa gələ bilər.

“Football-plus.az” xəbər verir ki, çempionluğa ən yaxın görünən PSJ “Nitsa” ilə səfər oyununda Messinin sayəsində qalib gəldi. Liderin ən yaxın izləyicisi “Lans” isə “Strasbur”un müqavimətini çətinliklə qırdı. ÇL-ə vəsiqəyə iddialılardan “Marsel”lə “Monako” büdərdi. Cənublular “Loryan”la oyunda heç-heçə etdisə, “Nant”la oyunda 2:0 önə çıxan “knyazlar” qələbəni əldən verdi. “Lill”in aşkar autsayder “Anje”yə uduzması turun sensasiyasıdı. “Renn” də Loran Blanın rəhbərliyi altında çox baxımlı oyun göstərməyə başlayan “Lion”a uduzdu.

PSJ “Nitsa”nın qonağı idi. Parislilərin baş məşqçisi Kristof Qaltye ötən mövsüm məhz bu komandanı çalışdırırdı. Yerli azarkeşlər Qaltyenin “xərcəng”dən əziyyət çəkən anasıyla bağlı təhqiramiz plakat açmışdı. Hücum futbolu nümayiş etdirən “Nitsa” çoxlu təhlükəli vəziyyət yaratdı, 21 zərbə vurdu, amma qola həsrət qaldı. Hesabı 26-cı dəqiqədə Mendeşin ötürməsindən sonra Messi açdı. Hissənin sonluğu “qartallar”ın üstünlüyü şəraitində keçdi. 2-ci hissənin əvvəlində PSJ-nin köməyinə qapı tiri çatdı. 52-ci dəqiqədə Donnarumma Pepenin zərbəsinin qarşısını aldı. Ümumiyyətlə, italiyalı qolkiper bu oyunda möhtəşəm təsir bağışladı, dəfələrlə komandasını qoldan xilas etdi. 76-cı dəqiqədə Messinin yerinə yetirdiyi künc zərbəsindən sonra fərqi artıran Ramos qalibi müəyyənləşdirdi.
“Lans” evdə “Strasbur”la qarşılaşdı. Bu komandalar ilk dövrədəki oyundan məhsuldar heç-heçə (2:2) ilə ayrılmışdı. “Qan-qızılılar” bu dəfə büdrəmədi. Onları 11-ci dəqiqədə Frankovski irəli çıxardı. Hissənin qalan dəqiqələri qarşılıqlı hücumlar şəraitində keçdi. Fasilədən sonra isə qonaqlar hücum etdi, qolu yenə meydan sahibləri vurdu. Medina gözlənilmədən cərimə meydançası xaricindən zərbə vurdu, qapıçı onu dəf etməyə hazır deyildi. Qonaqlar, daha dəqiqi, Qameyro 84-cü dəqiqədə intriqanı bərpa etsə də, “Strasbur”un bundan artığına gücü çatmadı.
“Marsel” hazırda möhkəm ortabablardan sayılan “Loryan”ın qonağı idi. Meydandakı ən fəal oyunçu olan Cengiz Ündərin canfəşanlığına rəğmən, hesabı açmaq mümkün olmadı. Düzünə qalsa, qolsuz heç-heçə bu oyunun qanunauyğun nəticəsidi.
“Monako” turnir cədvəlinin ikinci “10-luğ”unda qərarlaşsa da, kubokun finalına çıxan “Nant”la səfərdə qarşılaşdı. Ilk yarını yaxşı keçirən “knyazlar” fasilədən sonra çox zəif oynadı. 21-ci dəqiqədə Disasi hesabı açdı, yarım saatın tamamında isə Matazo mövsümdəki ilk qolunu vurdu. 2-ci hissədə meydanda bir komanda – “Nant” var idi. 65-ci dəqiqədə misirli Məhəmmədə məhsuldar ötürmə verən Blas 78-ci dəqiqədə hesabı bərabərləşdirdi.
Qələbəni əldən verən “Monako”nun bəxtindən “Lill” də hesabat turunda xal itirdi. Buna qədər yalnız iki qələbəsi olan, elitanı tərk edəcəyi heç kimdə şübhə doğurmayan “Anje” avrokuboklara vəsiqəyə iddialı “şimallı itlər”i məğlub etdi. “Renn”i qəbul edən “Lion” əzmkar qələbə qazandı. “Şirlər” Quirinin hesabı açmasına üç qolla cavab verdi. Turun qalan oyunlarına gəlincə, “Oser” səfərdə autsayder “Ayaçço”nu darmadağın etdi, “Tuluza” isə “Monpelye”yə qalib gəldi. “Reyms”lə “Brest” meydandan “sülh”lə ayrıldı. Meydan sahiblərini məğlubiyyətdən 90-cı dəqiqədə penaltini dəqiq yerinə yetirməklə mövsümdəki 18-ci qolunu vuran Baloqun qurtardı. Nəhayət, “Klermon” “Trua”nı iki cavabsız qolla məğlub etdi.

Turun rəqəmi
1 – Messi PSJ-nin heyətində son 5 oyunda bir qol vurub. Argentinalı ulduz sonuncu dəfə martın 4-də - “Nant”la oyunda (4:2) fərqlənmişdi. O, cari mövsümdə keçirdiyi 25 çempionat oyununda 14 qol vurub və 14 məhsuldar ötürmə verib.

Turun ulduzu
Lionel Messi (PSJ) – möhkəm ortabablardan olan “Nitsa” ilə oyunun taleyini qol və məhsuldar ötürmə ilə həll etdi. Leo həm də Avropa klublarının heyətində rəsmi oyunlarda qol sayına (702) görə Kriştiano Ronaldonu (701) arxada qoydu.