“Qalatasaray” çempionluğa doyunca sevinməmiş bir-birinin ardınca bəd xəbərlər almaqdadı. Son 2-3 gündə kluba verilən təzminat cəzalarının həcmi az qala 6 milyon avroya çatıb.

"Football-plus.az"ın məlumatına görə, birinci xəbər Omar Elabdellauidən gəldi. 2020-ci cilin yayında, Fatih Terimin dönəmində transfer edilən norveçli sağ cinah müdafiəçisi yaşadığı şanssızlıqla diqqəti çəkmişdi. 2020-ci il dekabrın 31-də o, ailəsi ilə birgə yeni ili qeyd edərkən əlində fişəng partamış və gözündən ciddi xəsarət almışdı. Təxminən 14-15 ay müalicə olunan 31 yaşlı futbolçu 2021/22-nin ikinci dövrəsində qayıtmışdı. Ötən yay Elabdellauinin komandada qalacağı gözlənilirdi. Amma İstanbul nəhəngi mövsüm başlayandan bir müddət sonra bu futbolçu ilə birtərəfli şəkildə müqaviləni pozdu. Təbii ki, hələ birillik müqaviləsi olan Elabdellaui düşünmədən FİFA-ya şikayət etdi. Qurumun qərarı ilə “Qalatasaray” norveçliyə 2,8 milyon avro təzminat ödəməli olacaq! “Aslan”ın məsələni İdman Arbitraj Məhkəməsinə (İAM) daşıyacağı gözlənilir.

Elabdellauinin şokunu üzərindən atmamış “Qalatasaray”a daha iki bəd xəbər gəldi. FİFA-nın qərarı ilə İstanbul nəhəngi Domenek Torrentə 2,6 milyon avro, ötən mövsümün ikinci dövrəsində “Fiorentina”dan icarəyə götürülən Erik Pulqara isə 450 min avro təzminat ödəməli olacaq. Əslində Torrent məsələsində bir qədər qarışıqlıq yaranıb. Çünki FİFA kataloniyalı məşqçi ilə bağlı qərarını hələ yanvarda vermişdi. “Qalatasaray” da məsələni İAM-a daşımışdı. İndi bənzər xəbərlərin yenidən çıxmasının səbəbi bəlli deyil. Ya da ola bilər ki, İAM artıq qərarını verib və FİFA-nın qərarı qüvvədə qalıb. Sadəcə, Türkiyə mətbuatı olayı düzgün işiqlandırmır. Bilindiyi kimi, ötən mövsümün gedişində “sarı-qırmızılar” Fatih Terimlə yollarını ayıraraq Torrentlə ilyarımlıq müqavilə imzalamışdı. Klub tarixinin ən çətin dönəmlərindən birini yaşayaraq mövsümü 13-cü pillədə bitirmişdi. Halbuki Torrent komandanı 12-ci pillədə qəbul etmişdi. Mövsüm bitən kimi rəhbərlik dəyişmiş və Torrentlə yollar ayrılmışdı. Qvardiolanın köməkçisi olmaqdan başqa CV-sində heç bir uğur olmayan 61 yaşlı mütəxəssis “Qalatasaray”dan alacağı təzminat hesabına nəinki özünün, hətta nəvələrinin də gələcək həyatını təmin edəcək. Özü də bu 3 nəfərə olan 5,85 milyon avroluq borc iyulun 1-nə qədər ödənilməsə, “Qalatasaray”a transfer qadağası qoyula bilər!

Maraq üçün bildirək ki, 5,85 milyon avro 127 milyon lirə deməkdi. Çempion olan “Qalatasaray”ın builki gəliri cəmi 194 milyon lirəyə bərabərdi. Yəni bu gəlirin üçdəikisi təzminata gedəcək! Düzdü, komanda ÇL-də qrup mərhələsinə vəsiqə qazanmaqla maliyyə durumunu yaxşılaşdıra və ən azı 15 milyon avro qazana bilər. Türkiyədəki inflyasiyadan sonra yayın gəlirləri 500 milyon dollardan 130 milyon dollara düşdüyündən faktiki ölkə çempionu bu uğurun qarşılığında qəpik-quruş qazanır. Təsəvvür edin ki, bu mövsüm “Qalatasaray” 108 milyon avroluq bir heyət qurub. Bura oyunçuların transferləri üçün ödənilən məbləğ, bonuslar, onların illik maaşı və s. daxildi. Bu məbləğ türk pulu ilə 2 milyard 428 milyon lirəyə bərabərdi. Çempionluq isə yuxarıda qeyd etdiyimiz kimi, kluba cəmi 194 milyon lirə, yəni heyətin qurulmasına sərf olunan puldan 12 dəfə az bir məbləğ qazandırıb!