Mövsümboyu çətinliklər yaşayan, düşərgəsində daim qalmaqallar yaşanan “Kəpəz” çətinliklə də olsa premyer-liqada yerini qoruya bildi.

İndi hamını bir sual düşündürür. Görəsən, Tərlan Əhmədov Gəncə klubunda qalıb işini davam etdirəcək, yoxsa rəhbərlik yeni mövsümə yeni baş məşqçi ilə başlayacaq?

Yeri gəlmişkən onu da qeyd edək ki, Əhmədov mövsümün gedişində “komandanı elitada saxlayıb, gedəcəm” kimi açıqlamalarla yadda qalmışdı. Ancaq son turlarda baş məşqçi “rəhbərlik istəsə, postumda qala bilərəm” kimi açıqlama verməyi də unutmamışdı.

Bu isə o deməkdi ki, Əhmədov problemlərin çox olmasına, özü dediyimi kimi “vitaminsiz, tərcüməçisiz, avtobussuz komanda” da qalmaqda maraqlıdı. İndi “top” rəhbərliyin tərəfindədi. İdarə Heyəti baş məşqçi ilə bağlı suala cavab verməlidi.

Sözgedən məsələ ilə bağlı “Football-plus.az” a ilginc məlumat daxil olub. Kluba yaxın mənbədən əldə etdiyimiz bilgiyə əsasən, klub rəhbərliyi 51 yaşlı mütəxəssisin xidmətində maraqlıdı. Artıq tərəflər arasında ilkin danışıqlar olub. Yaxın günlərdə, daha dəqiq desək, iyunun 4-dən sonra rəsmilərlə baş məşqçi arasında yeni müqavilənin detalları müzakirə olunacaq.

Əsas müzakirə olunacaq mövzu isə məvaciblə bağlıdı. Əhmədov 2023/24 “futbol ili”ndə daha yüksək maaş tələb edir. Danışıqların iyunun 4-dən sonrasına qalmasına gəlincə, məhz bu tarixdə Əhmədovun oğlunun toyudu. Bu aralıqda Tərlan bəyin başı toy tədarükünə qarışıb.

RƏŞAD