Cari mövsümdə birinci divizionda uğursuz çıxışla yadda qalan, turnir cədvəlinin sonuncu pilləsində qərarlaşan “Sumqayıt-2”də növbəti dəfə məşqçi dəyişikliyi yaşanıb.

Komanda çempionata Vüqar Quliyevin rəhbərliyi altında başalasa da, nəticələrdən narazı qalan rəhbərlik ikinci dövrənin əvvəlində onu istefaya göndərməyi lazım bildi. Və əvəzində əvəzedicilərin “sükanı” Quliyevin dönəmində köməkçisi kimi çalışmış Azər Mehdiyevə tapşırıldı. Ancaq Azər bəy də bu postda çox duruş gətirə bilmədi.

Mehdiyevin rəhbərliyi altında “Sumqayıt-2” dörd matça çıxıb ki, bunlardan birində qalib, üçündə məğlub olub.

“Football-plus.az” xəbər verir ki, bu göstəricidən də narazı qalan rəsmilər bu dəfə baş məşqçi postuna Vaqif Cavadovu gətirib.

Xatırladaq ki, Cavadav buna qədər “Sumqayıt”ın U-19-nu çalışdırıb. Kluba yaxın mənbədən əldə etdiyimiz məlumata görə, Vaqif bəy mövsümün sonuna kimi həm U-19-u, həm də əvəzedici komanda da çalışacaq.

RƏŞAD