Üç aydan sonra “Qarabağ”ın “Ferentsvaroş”u Budapeştdə məğlub etməsinin bir ili tamam olacaq.

Həmin o möhtəşəm tarixdən 365 gün keçəcək. Azərbaycan çempionu Bakıda keçirilən ilk oyunda azarkeşlərini qələbəylə sevindirə bilməmişdi.

Rusiyalı mütəxəssis Stanislav Çerçesovun çalışdırdığı “Ferentsvaroş” Bakıdakı oyundan sonra növbəti mərhələyə yüksəlmək şanslarını daha da artırmışdı. 1:1 hesablı heç-heçədən sonra istənilən hesabla qələbə macarları növbəti mərhələyə yüksəldəcək, “Qarabağ”ın Çempionlar Liqasının qrupuna doğru yürüşünü dayandıracaqdı. Səfərdə oynayan “köhlən atlar” rəqibini doğma meydanda məğlub edə bilməməklə tapşırığı bir qədər qəlizləşdirmişdi.

Vəziyyət belə tələb edirdi ki, qol axtaran tərəf məhz “Qarabağ” olacaqdı. Səfərdə oynayan komandamız rəqibin pusquda dayanıb, öz fürsətini gözləməsinə imkan verməmək üçün erkən qol vurmalıydı. Bu qol rusiyalı çalışdırıcı, hiyləgər Çerçesovun planlarını pozacaq, komandasını “açılmağa”, irəli getməyə məcbur edəcəkdi.

Bundan sonrası daha asan olacaqdı. Qurban Qurbanov Bakıdakı oyunda rəqibin güclü və zəif tərəflərini öyrənmiş, Macarıstan çempionunun kürəyini yerə vurmağın yollarını yetirmələrinə başa salmışdı. Əsas olan erkən qolu vurmaq idi ki, “köhlən atlar” bunu bacardı. Artıq 7-ci dəqiqədə Zubir azərbaycanlı azarkeşləri xoşbəxt edən, macarları şoka salan qolu Dibusun qorumağa çalışdığı qapıdan keçirdi. İlk hissəni öndə tamamlayan “Qarabağ” bununla vacib olan psixoloji üstünlüyü də əldə etmişdi.

İrəli atılan, cavab qolu vurmağa çalışan “Ferentsvaroş”un müdafiəsində mütləq boşluq tapılacaqdı ki, onda da rəqibə həlledici zərbəni endirmək imkanı yaranacaqdı.

Gözlədiyimiz məqam 54-cü dəqiqədə yetişdi, ikinci hissənin startından təxminən 9 dəqiq sonra. İlk yarı ilə paralellər aparanda görürük ki, “Qarabağ” hər iki hissənin əvvəllərində qol vurmağı bacarıb. Bu da təsadüf sayıla bilməzdi. Vaci 54-cü dəqiqədə meydan sahiblərini ikinci dəfə meydanın mərkəzinə dəvət etdi.

Bundan 24 dəqiqə sonra isə İbrahima özünün ikinci, “Qarabağ”ın üçüncü qolunu rəqibin qapısından keçirdi. 3:0 hesabı Macarıstan çempionu üçün hər şeyin sonunun gəldiyindən xəbər verirdi. Təcrübəli “Qarabağ”ın qalan 12 dəqiqə ərzində qapısından üç top buraxması, “Ferentsvaroş”un və Çerçesovun ölən ümidlərini yenidən cücərtməsi imkansız idi. Bütün gücünü toplayaraq irəli atılan Macarıstan çempionu Şahruddin Məhəmmədəliyevin qoruduğu qapıya bir dəfə yol tapa bildi. Traorenin 86-cı dəqiqədə vurduğu həmin qol “Ferentsvaroş” azarkeşləri üçün zəif təsəllidən başqa bir şey deyildi.

Üzərindən 9 ay keçəndən sonra yenidən həmin oyunu xatırlamağım, ayrı-ayrı epizodların üzərində dayanmağım heç də səbəbsiz deyil. Bəlkə də çoxunuz həmin matçdakı hesabı xatırlasaz da, detalları unutmusuz, qolların necə, neçənci dəqiqələrdə vurulduğunu yaddan çıxarmısız. Çünki “Qarabağ” bizi belə möhtəşəm qələbələrə, uğurlara öyrəşdirib. Amma rusiyalı mütəxəssis Stanislav Çerçesovun ölkəsinin mətbuatına verdiyi müsahibəni oxuyandan sonra mən o günləri xatırladım. Sizi də həmin günlərə qaytarmağı lazım bildim.

Hiss etmək çətin deyil ki, Çerçesov “Qarabağ”ı, Azərbaycan çempionunun sərgilədiyi möhtəşəm oyunu, onları necə məğlub etməyimizi unutmayıb. Onun ürəyini qəzəb, paxıllıq hissi boğur, yenilgini heç cür qəbul etmək istəmir. Çerçesov azərbaycanlı mütəxəssis Qurban Qurbanova və onun komandasına uduzmağı özünə sığışdırmır, taleyi ilə barışmır. Di gəl ki, onun qəzəbi də, paxıllıq hissi də bu acı reallığı dəyişmir.

Qurban Qurbanovun “Qarabağ”ı Stanislav Çerçesovun “Ferentsvaroş”unu ağır məğlubiyyətə uğradıb, Çempionlar Liqası kimi nüfuzli turnirdən kənarlaşdırıb. Reallıq və tarix budu.

Çerçesovun Rusiya mətbuatına dediklərinə diqqət edək: “Qarabağ”la oyunda 15 dəqiqəlik zəif çıxış bizi Çempionlar Liqasından kənarlaşdırmağa kifayət etdi”. Çox qəribədi, rusiyalı çalışdırıcı hansı 15 dəqiqəlik periodu nəzərdə tutur?

Məgər 180 dəqiqəni əhatə edən iki qarşılaşmanın qalan dəqiqələrində onun komandası güclü oynamışdı və “Qarabağ”ı üstələmişdi? Az əvvəl qolların vurulduğu dəqiqələri də xatırlatdım, oyunun axarını təhlil edəndə gördük ki, “Qarabağ” rəqibini 15 dəqiqə ərzində üstələməyib. Əksinə, birinci hissənin əvvəlində Zubirin qolu onların planlarını pozub, fasilədən sonra isə Vaci 24 dəqiqəyə dublunu rəsmiləşdirib.

Göründüyü kimi, “15 dəqiqəlik zəif çıxış” ifadəsi heç bir halda oyunun axarıyla uzlaşmır. Hiss etmək çətin deyil ki, Çerçesov qəzəbdən, yaxud da paxıllıqdan reallıq hissini itirib, faktları təhrif edəcək qədər həyasızlığa yol verib. Onu başa düşmək çətin deyil. Adam “Qarabağ”ın ona vurduğu zərbəni həzm etməyə də, unutmağa da çətinlik çəkir. Bundan sonra da “Qarabağ” onun üçün unudulmaz olacaq. Azərbaycan çempionunun böyüklüyünü qəbul etmək bu qədərmi çətindi?

AMAL