“Real” yeni mövsümün transfer əməliyyatlarına start verib. İspaniya nəhəngi artıq iki futbolçu ilə anlaşıb.

"Football-plus.az" xəbər verir ki, onlardan biri İbrahima Konatedi. O, ötən ay “Liverpul”u azad agent kimi tərk etmişdi. “RMC Sport”un məlumatına görə, 27 yaşlı fransalı müdafiəçi Madrid klubu ilə müddəti 2030-cu ilin yayına qədər nəzərdə tutulan müqavilə imzalayıb. İbrahimanın transferi klubun sabiq və yeni prezidenti Florentino Peresin seçki kampaniyası dövründə vəd etdiyi əsas keçidlərdən biri kimi təqdim olunmuşdu. Futbolçu hazırda Fransa yığmasının düşərgəsində dünya çempionatına hazırlığı davam etdirir. “Liverpul”da keçirdiyi 5 il ərzində qırmızı formada meydana çıxdığı 183 matçda 7 qol vuran, 4 məhsuldar ötürmə verən İbrahima İngiltərə çempionluğunu, iki dəfə Liqa kubokunu, bir dəfə isə ölkə kuboku və superkubokunu qazanıb.

Onun kimi Denzel Dyumfris də yeni mövsümə “Real”da başlayacaq. Hələ ki, onun Madrid klubu ilə hansı müddətə anlaşmasıyla bağlı məlumat açıqlanmayıb. Niderlandlı müdafiəçi 2021-ci ildən “İnter”də çıxış edirdi. Bu klubla iki dəfə İtaliya çempionu olan 30 yaşlı futbolçu üç dəfə ölkə kubokunu, üç dəfə isə ölkə superkubokunu qazanıb. Milanlıların heyətində keçirdiyi 207 oyunda 27 qol vurub, 28 məhsuldar ötürmə verən Denzel İtaliyaya yollanmazdan əvvəl ölkəsində “Sparta”, “Herenven” və PSV-nin şərəfini qoruyub.