Çempionlar Liqasının ikinci təsnifat mərhələsində “Sürix”i mübarizədən kənarlaşdıran “Qarabağ”ın növbəti rəqibi Macarıstan təmsilçisi “Ferentsvaroş” olacaq.

Əsası 1899-cu ildə qoyulan klub çempionluq tituluna görə ölkəsinin rekorçusudu (33 dəfə çempion olub, 24 dəfə ölkə kubokunu qazanıb). 1995-də Çempionlar Liqasının qrup mərhələsinə yüksəlməklə Macarıstan komandaları arasında ilkə imza atıb. 2004-də isə “yaşıl qartallar” Avropa Liqasının qrup mərhələsində iştirak edib. Ev oyunlarını 23698 tamaşaçı tutumuna malik “Qroupama Arena”da keçirir. Klubun prezidenti Qabor Kubatov, baş məşqçisi Stanislav Çerçesovdu.

“Ferentsvaroş” mövsümlərarası fasilədə heyətini yetərincə gücləndirib. Stanislav Çerçesovun çalışdırdığı komandanın ən diqqət çəkən transferi “Şerif”dən ayrılan Adama Traoredi. Dünyaca məşhur “transfermarkt.com” şirkəti vingerin transfer dəyərini 3 milyon avro göstərib. “Yaşıl qartallar”ın Belçika “Leuven”indən dəvət etdiyi Xavyer Merciyerin isə bazar dəyəri 500 min avrodu. Hücumameyilli yarımmüdafiəçi mövqeyində çıxış edir. Rasmus Çelander isə “Olborq”dan transfer olunub.

Komandanın əsas qol ümidi Kot d’İvuardan olan Frank Bolidi. 28 yaşlı forvard “Slovan”la matçda da adını tabloya yazdırmağı bacarıb. Ondan başqa, Bratislavada keçirilən matçda Adama Traore, norveçli Kristoffer Zaşariassen və tunisli Aissa Laioduni fərlənib. Onu da qeyd edək ki, “Ferentsvaroş”un heyətində fərqli yığmalara cəlb olunan 14 futbolçu çıxış edir. Komandada orta yaş həddi 26,4-dü.

Macarıstanın son çempionu daha çox 4-2-3-1 taktiki sxemi ilə meydana çıxır.

RƏŞAD