Vaxtilə azərbaycanlı futbolsevərlər Araz Abduallayev ad-soyadını sevinclə qarşılayırdı.

Hamı düşünürdü ki, bu adam ölkə futboluna böyük xeyir verəcək. Bir sözlə, hamının gözü yarımmüdafiəçidə idi. Hər yerdə onun istedadından danışılırdı. Gənc yaşlarında “Neftçi”nin əsas heyətinə düşməyi bacarmışdı. Hətta İngiltərənin adlı-sanlı klublarından “Everton”a da transfer olundu. Sonradan isə işlər korlandı. Arazın karyerasında ildən-ilə eniş baş verdi. Vəziyyət o qədər pisləşdi ki, yarımmüdafiəçi hazırda klubsuzdu. Onun istedadına güvənənlər yoxdu. Niyə? Bunda günahkar kimdi? Bu yazıda Arazın başına gələnlərdən bəhs edəcəm.

Ailə faciəsi

Abdullayev gənc yaşlarında kədərli hadisə ilə üzləşir. Bəlkə də bunu çoxları bilmir. Lakin onun atası vaxtından əvvəl vəfat edib. Futbolçunun valideyni ağır xəstəlikdən əziyyət çəkdiyi üçün intihar edib. Həqiqətən böyük dərddi. Məhz bu məqam Arazın psixoloji cəhətdən çökməsinə şərait yaratdı. Hər nə qədər peşəkar olmağa çalışsan da, valideyn itirmək insana böyük təsir edir. Araz da bu hadisəni qəbullana bilmədi. Onunla yaxınlıq edənlər də deyir ki, futbolçu atasının intihar etməsini unuda bilmir. Hətta bəzən gecələr buna görə yuxusuz da qalır. Hər nə qədər istedadlı olsa da, yaşadığı dramatik hadisə, psixoloji sarsıntılar onun toparlanmasına imkan vermədi.

Foqtsun inadkarlığı

Almaniyalı mütəxəssis uzun müddət yığmamıza rəhbərlik etdi. Onun ölkə futbolu üçün xeyirli və ziyanlı hərəkətləri oldu. Yaddaşımızı təzələsək, xatırlayarıq ki, Arazı parladığı dövrlərdə yığmaya çağırmırdı. Dəvət göndərsə də, meydana buraxmırdı. Arazın 16 yaşı olarkən, 2008-ci il noyabrın 10-da Finlandiya ilə səfər görüşündə debüt etməsinə şərait yaradan Foqts futbolçu “Everton”a transfer olunandan sonra səbəbsiz yerə inadkarlığa başladı. Niyə və nə üçün? Bunu heç kim bilmədi? Yarımmüdafiəçinin millinin heyətində 15-20 dəqiqə meydana çıxması onun inkişafına təkan ola bilərdi. Lakin almaniyalı bunu düşünmədi. Bu da Arazın çöküşünü sürətləndirən əsas məqamlardan idi.

Avtomobil qəzası

Bəlkə də Arazın karyerasının alınmamasının əsas səbəbi məhz bu hadisə oldu. Futbolçu avtomobil idarə edərkən qəza törətdi. O, süpərgiçi iki xanımı vurdu. Qəza nəticəsində qadınlardan biri dünyasını dəyişdi. Sonradan həmin xanımın ailəsi şikayətçi olmadı. Bu səbəbdən də Araz həyatını dəmir barmaqlıqlar arxasında yox, azadlıqda davam etdirdi. Bu hadisə də futbolçunun daha çox stress keçirməsinə səbəb oldu.

Xasiyyətindəki problem

Gənc yaşlarında “Everton”a transfer olunmaq, atasının ölümü, milliyə çağrılmamaq onun xasiyyətində boşluqların yaranmasına səbəb oldu. Bu da bir komandada əsas heyət üzvü olmamasına səbəb olurdu. “Everton”dan sonra haralarda oynamadı ki, Araz? “Panionios” (Yunanıstan), “Neftçi”, “Qəbələ”, “Anortosis” (Cənubi Kipr), “Qarabağ”, “Boluspor” (Türkiyə), “Etnikos” (Cənubi Kipr), “Sumqayıt” yarımmüdafiəçinin gəzib-dolaşdığı klublardı. Oyun tərzinə fikir versək, Araz olduqca sərt futbol sərgiləyir. Həm də topla hərəkətlər etməyi çox sevir. Bu da məşqçilərin qəzəbinə tuş gəlirdi. Düşünün ki, ölkənin ən yaxşı baş məşqçisi olan Qurban Qurbanovun yanında Araz Abdullayev baş çıxara bilmədi. Çünki xasiyyətində boşluqlar var. Məşqlərə gecikir, özünü yaxşı tərəfdən göstərə bilmirdi. Bu da zamanla futbolçunun dəyərsizləşməsinə səbəb oldu.

Araz indi klubsuzdu. Məndə olan məlumata görə, meneceri ona yeni komanda axtarır. Özü də ölkə xaricində. Yəqin ki, növbəti mövsüm Cənubi Kipr, Litva, Latviya klublarının birində top qovar. Lakin Araz boş dayanmır. Şəxsi “instaqram” hesabındakı paylaşımlardan məşq etdiyini, fiziki durumunu yaxşılaşdırmağa çalışdığını görürük. Belə məqamda qalmaqal yaratmağa da vaxt tapıb. Üç gün öncə sosial şəbəkərlərdə video yayıldı. Futbolçu “TikTok” sayəsində məşhurlaşan Kənan adlı dayanacaq nəzarətçisinə qarşı kobud davranaraq gündəmə gəldi. Hamı başladı bir zamanların məşhur simasını pisləməyə. O da özünü təmizə çıxarmaq üçün yeniyetmədən üzr istədi. Hətta ona milli komandada çıxış edərkən geyindiyi formanı hədiyyə etdi. İnsan həyatıdı. Qınamaq olmur. Bəlkə də həmin an əsəbi olub. Bu qədər şey yaşayan birinin belə davranması adi haldı. Əsas odu ki, insanların reaksiyasından sonra səhvini qəbul edərək üzr istəyib.

İndi də deyirlər ki, Araz modelliyə başlayıb. Çəkilişlərdə iştirak edərək gəlir əldə edir. Nə deyirəm, xeyirli olsun. Özündənrazılığı onun futbolçu karyerasına böyük zərbə vurdu. Ümid edirəm ki, modelyerlikdə işinə yarayar.

İLKİN SULTANLI