''Qalatasaray'' rəhbərliyi bir tərəfdən transfer mövzusunu gündəmdə saxlayırsa, digər tərəfdən klubun beynəlxalq səviyyədə nüfuzunu gücləndirə biləcək addımlar atır.

Məsələn, Türkiyə mətbuatının yazdığına inansaq, bu gün idarə heyətinin bir üzvü Almaniya futbolunun və ''Bavariya''nın əfsanəsi Oliver Kan ilə görüşəcək. Burda İstanbul nəhənginin gələcəklə bağlı planlaşdırması, Avropadakı hədəfləri və nüfuzu müzakirə olunacaq.

Futbolçu kimi zatən adını Almaniya futbolu tarixinə yazdıran, bir çox önəmli göstəricilərin sahibi olan Kanın funksioner kimi də təcrübəsi var. 56 yaşlı Kan 2021-23-cü illərdə Münhen nəhəngində idarə heyətinin sədri vəzifəsini icra edib. Ümumiyyətlə iddialara inansaq, ''Qalatasaray''ın Almaniya mərkəzli müəyyən planları var. Daha öncə Fernando Muslera sayəsində Cənubi Amerika ''bazarı'' ilə bağlı müəyyən çalışmalar həyata keçirilmişdi.

''Sarı-qırmızılar'' dünyanın fərqli nöqtələrində marka dəyərini gücləndirmək istəyir. Almaniya həm güclü türk diasporasına, həm də mühüm futbol infrastrukturuna malik olduğu üçün ''Qalatasaray''ı cəlb edir. Bu yöndə konkret hansı addımların atılacağı maraq doğurur.