Xəbər verdiyimiz kimi, FİFA dünya çempionatı üçün yeni stadion qaydalarını açıqlayıb. Yeniliklər arasında qadağalara daha çox rast gəlinir.

"Football-plus.az" xəbər verir ki, ali futbol qurumunun qərarına əsasən, ABŞ, Kanada və Meksikanın birgə evsahibliyi edəcəyi mundialın oyunlarında vuvuzelalardan istifadə də qadağan olunub.

“Reuters” agentliyinin xəbərinə görə, azarkeşlərin stadionlara vuvuzela, hava siqnalı və digər yüksək səs-küy yaradan alətlərlə daxil olmasına icazə verilməyəcək. Qaydanı pozan şəxslər arenaya buraxılmayacaq və ya stadiondan uzaqlaşdırılacaqlar. Vuvuzelalar xüsusilə 2010-cu ildə Cənubi Afrikada keçirilən dünya çempionatında məşhurlaşmış və turnirin əsas rəmzlərindən birinə çevrilmişdi. Lakin alətin yaratdığı fasiləsiz yüksək səs uzun müddət dünya futbol ictimaiyyətində müzakirə mövzusu olub.

FİFA-nın yeni Davranış Məcəlləsində lazer şousu, fitlər və digər səs-küylü vasitələr də yasaq əşyaların siyahısına salınıb.

Amma bu da var ki, FİFA azarkeşlər üçün su qadağası ilə bağlı qərarına yenidən baxmalı olub. Ali futbol qurumu ABŞ və Kanadada keçiriləcək oyunlarda stadionlara plastik su butulkası gətirilməsinə icazə verildiyini açıqlayıb. Qərara əsasən, azarkeşlər istehsalçı tərəfindən möhürlənmiş və 590 ml-ə qədər olan bir ədəd yumşaq plastik butulka ilə stadiona daxil ola biləcəklər. Lakin metal və ya sərt materialdan hazırlanan su qablarının gətirilməsinə dair qadağa qüvvədə qalıb.

FİFA-nın məlumatında bu addımların azarkeşlərin rahatlığını artırmaq məqsədilə atıldığı bildirilib.