Məşhur ''transfermarkt'' portalı 2025/26 mövsümü üçün sonuncu dəfə premyer-liqa futbolçularının qiymətini yeniləyib.

"Football-plus.az" xəbər verir ki, iyunda İngiltərə çempionatında çıxış edən ümumilikdə 524 futbolçunun qiymətində dəyişiklik baş verib. Premyer-liqa futbolçularının ümumi dəyəri 240 milyon avro geriləyərək 12,37 milyard avro olub. Amma istənilən halda bu, digər çempionatlarla müqayisədə açıq-aşkar üstün göstəricidi!

Premyer-liqanın ən çox bahalaşan futbolçusu ''Bornmut''un üzvü Eli Junior Krupi olub. İndidən nəhənglərin hədəfində olan gənc forvard 30 milyon avro bahalaşaraq dəyərini 70 milyon avroya çatdırıb. 2-ci pillədə Rayan Şerki qərarlaşıb. ''Mançester Siti''nin fransalı ulduzunun dəyəri 25 milyon avro artıb. Ən çox dəyər itirən futbolçu isə ''Tottenhem''in və İsveç yığmasının üzvü Deyan Kulusevskidi. O, 18 milyon avro geriləyib, indi dəyəri 17 milyon avrodu. Birdən-birə 15 milyon avro geriləyən 3 futbolçu var. Söhbət ''Mancester Siti''li Rodri, ''Tottenhem''li Mikki van de Ven və ''Liverpul''lu Aleksander İsakdan gedir.

Bu ay heyətinin dəyərinə görə ən çox geriləyən klub ''Tottenhem'' olub. Premyer-liqada böyük çətinliklə yerini qoruyan London nəhənginin heyəti 111 milyon avro dəyər itirib. İngiltərədə hələ də Erlinq Holanndan bahalı futbolçu yoxdu. Norveçli qoleadorun dəyəri 200 milyon avrodu. 2-ci pillədə 120 milyon avroluq dəyəri ilə ''Arsenal''ın kapitanı Deklan Rays, 3-cü pillədə 110 milyon avroluq dəyəri ilə ''Arsenal''ın vingeri Bukayo Saka qərarlaşıb.

Burda ən diqqətçəkən məqam Aleksander İsakın 85 milyon avroya geriləyərək ilk ''10-luğ''u tərk etməsi olub. Maraqlıdı ki, ötən yay mersisaydlılar bu forvarda görə nə az, nə çox - düz 145 milyon avro ödəyib.