Xəbər verdiyimiz kimi, “Sabah” mövsümlərarası fasilədə ilk transferini gerçəkləşdirib. “Bayquşlar” “Kayzer Çifs”in futbolçusu Eyden Makkarti ilə “3+1” illik müqavilə bağlayıb.

İş ondadı ki, anlaşma futbolçunun vətənində - Cənubi Afrikada böyük marağa səbəb olub. Eydenin həmvətənləri Masazır təmsilçisinin sosial şəbəkə hesablarına, xüsusən, “feysbuk”a axın edib. Klubun futbolçuyla razılığı elan etdiyi paylaşıma 26 min “layk”, 2100 şərh, 154 min izlənmə gəlib. Makkartinin “Sabah” formasıyla şəkillərinin yer aldığı paylaşım isə daha böyük kütlənin diqqətini cəlb edib. Belə ki, bu paylaşıma 73 min “layk”, 6200 şərh gəlib Minlərlə afrikalı artıq “Sabah” azarkeşi olduğunu bəyan edib.

Hələ bu harasıdı?! Makkartinin heyranları “Azərbaycanda hansı kluba nifrət etməliyik?” sualını verib, “Sabah” azarkeşlərindən “Qarabağ”a” cavabını alıblar. Necə deyərlər, dananın quyruğu burda qopub. Ardından tərəfdarlar “Qarabağ”ın ünvanına xoşagəlməz ifadələr yazmağa başlayıblar. Hətta bəziləri “köhlən atlar”ın sosial şəbəkə hesablarına “hücum edib” və “Sabah” azarkeşi olduqlarını, “Qarabağ”a nifrət etdiklərini bildiriblər.

“Bayquşlar”ın izləyici sayı da kəskin artıb. Hazırda klubun “feysbuk” səhifəsinin 105 min (dünən səhər saatlarında 50 min idi) təqibçisi var.

Ümumiyyətlə, Makkartinin Cənubi Afrikada həddən artıq sevildiyi məlumdu. Heç şübhəsiz, bu, onun ölkəsinin ən məşhur klublarından birində – “Kayzer Çifs”də forma geyməsiylə bağlıdı. Təsəvvür edin, onlar bu mərkəz müdafiəçisi sayəsində “Sabah”ın qapıçıya ehtiyacı olmadığını bildirir.

Görək, Makkarti Çempionlar Liqasında “bayquşlar”a nə dərəcədə yardım edəcək? Bütün bunlar Cənubi Afrika əhalisinin yaratdığı mifdi, yoxsa “Sabah” durnanı gözündən vurub?

KƏNAN BAHADIR