Bundestmdə böyük və qəfil itki - Karl da mundialı buraxacaq
“Bavariya”nın və Almaniya yığmasının yarımmüdafiəçisi Lennart Karl iyunun 11-də start götürəcək dünya çempionatını buraxacaq. 18 yaşlı futbolçu ABŞ ilə yoldaşlıq oyunu ərəfəsində keçirilən məşqlərin birində zədələnib.
"Football-plus.az" xəbər verir ki, sol budunun dördbaşlı əzələsini zədələyən Karl mundiala qədər bərpa oluna bilməyəcək. Yığmanın baş məşqçisi Yulian Naqelsmann Lennartın zədəsinin düşərgədə böyük şok doğurduğunu bildirib:
“Lenniyə görə hədsiz təəssüflənirəm. Xarakteri, oyun duyumu, sürəti ilə komandaya ideal şəkildə uyğun gələn futbolçudu. Onun özü və hamımız üçün dünya çempionatını buraxması böyük şokdu. Lennartın gənc olması, onu irəlidə hələ çoxlu turnir gözləməsi bizim üçün yüngülvari təsəllidi. Onun bizlə birgə olmasını çox istəyərdik”.
Yarımmüdafiəçi özü də açıqlama verməli olub. Təbii ki, təəssüfünü gizlətməyib:
“Nədən başlayacağımı bilmirəm. Ancaq ən böyük turniri buraxmaq inanılmaz dərəcədə ağrılıdı. Dünya çempionatına hazırlaşmaq üçün əlimdən gələni etdim. Təəssüf ki, zədə adamı tez-tez ən həssas məqamda yaxalayır. Komandama ən böyük uğuru arzulayıram, əlbəttə, hər an komanda yoldaşlarımı dəstəkləyəcəm. Söz verirəm ki, daha güclü qayıdacam. Uğurlar, Almaniya yığması”.
2025/26 Lennart üçün böyük futbolda debüt mövsümü oldu. Gənc yarımmüdafiəçi “Bavariya”nın əsas komandasında ilk oyunu iyunda klublararası dünya çempionatında “Oklend Siti”yə qarşı keçirdi (10:0). Ardından onu daha vacib oyunlarda müntəzəm meydana buraxmağa başladılar. Karl Çempionlar Liqasının “Brügge” ilə oyununda (4:0) münhenlilərin heyətində ilk qolunu da vurdu. Onda “Bavariya”nın baş məşqçisi Vensan Kompani jurnalistlərə belə demişdi:
“Lennart həmişə təhlükəlidi. O, həmişə öz yerindədi. İmkan qazanan kimi qatilə çevrilir. Bizim üçün çox vacib futbolçudu”.
Lennart 2025/26 mövsümündə keçirdiyi 40 oyunda 9 qol vurdu və 8 məhsuldar ötürmə verib. “Transfermarkt” portalı ona 60 milyon avro qiymət qoyub.
Almaniya yığmasında Karlın əvəzinə dünya çempionatına 20 yaşlı xavbek Assan Uedraoqo yollanacaq. O, ötən mövsüm “Leyptsiq”in heyətində keçirdiyi 20 oyunda “4+4” göstəricisi ilə yadda qalıb. Düzdü, Assan fərqli mövqenin oyunçusudu, meydanın mərkəzini gücləndirəcək. Naqelsmannın onunla bağlı fikri:
“Lenni ilə yanaşı, Uedraoqo da yığma karyerasına fantastik başlayıb. O da çox istedadlıdı, Assandan sərbəst və cəsur oyun gözləyirik”.
Xatırladaq ki, növbəti dünya çempionatı iyunun 11-də keçiriləcək Meksika – CAR oyunu ilə başlayacaq. Almaniya yığması qrup mərhələsində Kürasao, Kot d’İvuar və Ekvador yığmaları ilə qarşılaşacaq.
Digər xəbərlər
