Yığma fasiləsi başa çatdı və artıq klub futbolu qaldığı yerdən davam edir.

"Football-plus.az" xəbər verir ki, “Arsenal” İngiltərə premyer-liqasında çempionluğa ən real namizəd sayılır. Deməli, “topçular”ın çalışdırıcısı Mikel Artetanın da deməyə sözü çoxdu. Klubun mətbuat xidməti “Lids”lə oyundan öncə onun açıqlamalarına yer verib.

* Başqa klubların nəticələrinə nəzarət edə bilmərik. Biz yalnız hər gün öz hərəkətlərimizi nəzarətdə saxlayırıq: özümüzü necə aparırıq, necə məşq edirik, energimizi necə yönəldirik, azarkeşlərlə necə təmas qururuq... İndi söhbət ondan gedir ki, mövsümün qalan hissəsindən ləzzət almalıyıq. Entuziazm, enerji və böyük həvəs ilə işimizi görməyə davam etməli, hətta daha da “artırmalıyıq”. Düşünürəm ki, komandada çox yaxşı oyunçular toplaşıb. Mükəmməlləşmək, öyrənmək, daha yaxşı oynamaq onlar üçün maraqlıdı. Onlarla çalışmaq ayrıca məmnunluqdu. Gördükləri iş, həyat tərzi, birgə oynamaq onların xoşuna gəlir. Düşünürəm ki, siz də bunu hiss edirsiz.

*Cari mövsümdəki uğurların təməli hələ yayda qoyulub. Onda əvvəlki mövsümdə 5-ci yeri tutan komandanın nəticələri yaxşılaşdırmaq həvəsi məni heyran etmişdi. Komanda qələbələr qazandıqca özünəinam çərçivəsi yüksəldi, futbolçular 1-ci yeri tutmağa qadir olduqlarını anladılar. Ancaq bu özünəinamın və əla forma yığmağın həlledici amili komanda ruhudu.

* Yayda məzuniyyətdən döndüyümüz ilk gündə gördüyüm mənzərə xoşuma gəldi. Oyunçular futbol üçün acmışdı. Düşünürəm ki, transferlər komandaya böyük təsir göstərdi. Futbolçulara özünəinam qazandırdı, kollektivi yeni səviyyəyə qaldırdı. Onda – mövsümün əvvəlində söhbət bundan gedirdi: hər gün çalışmaqla ustalığı o səviyyəyə qaldıraq ki, futbolçular zirvəni ələ keçirməyə və orda dayanmağa qadir olduqlarına inansınlar.

* Bizdə həmçinin rəqabətin və əməkdaşlığın düzgün səviyyəsi formalaşıb. Oyunçular həqiqətən də bir-birinə yardım etmək istəyir. Bununla belə, onlar həm də bir-birinə “əlcək atmalıdılar” ki, komandaya fayda versinlər, oyun standartlarını yüksəltsinlər. Uğurlarımızın sirri ondadı ki, futbolçular arasında birlik və bağlılıq var – onlar birgə vaxt keçirməyi xoşlayır, fanatlarımız üçün fədakarlıq etməyə hazırdılar. Məhz bu kluba məxsus olduqlarını hiss etmələri həlledici amildi.

* “Arsenal”a fayda verən taktiki hiyləgərliklərdən biri də komanda topa sahib olarkən cinah müdafiəçilərindən meydanın mərkəzində yararlanmaqdı. Bu sxem Aleksandr Zinçenko kimi futbolçuların parlamasına imkan verir. Hələ Barselonadakı “La Masiya”da təlim alarkən Qvardioladan bunu öyrənmişdim. Biz “Barselona”da 3-4-3 sxemli romb şəklində oynayırdıq, fullbeklərimizdən biri tez-tez mərkəzə yönəlirdi. Pep “Bavariya”da olarkən Filipp Lamdan da belə yararlandı. Başqa idman növlərinin və başqa məşqçilərin təcrübəsindən yararlanmaq yaxşıdı, inkişafın yollarından biri də budu.