“Deməzdim ki, “Qarabağ”da ciddi problem baş verib. Düzdü, nəticələr baxımından müəyyən geriləmə var və bu da suallar yaradır. Çünki biz məğlubiyyətə öyrəşməyən bir “Qarabağ” görmüşük. İndi isə bu məğlubiyyətləri görəndə istər-istəməz “nə baş verir” sualı ortaya çıxır.

Ən vacib məqam odu ki, “Qarabağ” oyun üslubunu qoruyur və bu üsluba uyğun yenilənmiş komanda formalaşdırmaq istiqamətində addımlar atır. Bu mövsüm komandaya yeni futbolçular cəlb olunub, onları “Qarabağ”ın fəlsəfəsinə uyğunlaşdırmaq o qədər də asan proses deyil. Bu, zaman tələb edir.

Düşünürəm ki, transfer olunan futbolçuların əksəriyyəti keyfiyyət baxımından yetərincə yaxşıdı. Sadəcə, onların komandaya tam uyğunlaşması üçün vaxt lazımdı. Zaman keçdikcə biz yenidən, öyrəşdiyimiz “Qarabağ”ı görə bilərik.

Sırf son son oyuna gəlincə, komanda yenə də öz oyun tərzinə sadiq qaldı – topa nəzarət etdi, oyunu idarə etməyə çalışdı, qol vəziyyətləri yaratdı. Lakin əsas problem bu epizodların reallaşdırılması ilə bağlıdı. Son zərbələrdə kəsər çatmadı. Üstəlik diqqətsizlik nəticəsində buraxılan erkən qol rəqibin ruhlanmasına səbəb oldu. “Dinamo” bu qoldan sonra daha inamlı oynamağa başladı, “Qarabağ” isə müəyyən mənada tələsdi və bir çox hücum cəhdlərini düzgün tamamlaya bilmədi.

Ümumilikdə “Qarabağ” öz oyun fəlsəfəsini qoruyur. Sadəcə, 7-8 yeni legionerin heyətə tam uyğunlaşması üçün zamana ehtiyac var.

Digər bir məqam da ondan ibarətdi ki, yerli çempionat başlamamış komandanın birbaşa gərgin avrokubok oyunlarına çıxması futbolçuların optimal fiziki formaya çatmasına müəyyən qədər təsir edir.

Buna baxmayaraq, inanıram ki, cavab matçında “Qarabağ” azarkeşləri önündə bu səhvləri düzəldə və növbəti mərhələyə yüksəlmək üçün lazım olan nəticəni əldə edə bilər. Biz həmişə “Qarabağ”a inanmışıq və dəstəyimizi davam etdirmişik. Ümid edirəm ki, komanda avqustun 13-də Tofiq Bəhramov adına stadionda müsbət nəticə qazanaraq pley-offa yüksələcək”.