“Arsenal” üçün fevral və mart uğurlu oldu.

Mikel Artetanın komandası 7 oyundan yalnız birində uduzdu, onda da “Liverpul”a. Təsadüfi deyil ki, premyer-liqada martın ən yaxşı baş məşqçisi üçün mükafat Artetaya qismət oldu. Aprel isə arzuolunmaz sürprizlə başladı – “topçular” “Kristal Pelas”la səfər oyununda darmadağından (0:3) qaça bilmədi.

•‎ “Arsenal” premyer-liqada 5-ci dəfə London derbisində 3 və daha artıq top fərqi ilə uduzdu. Özü də əvvəlki belə məğlubiyyət də “Kristal Pelas”la oyunda, “Selherst Park”da qeydə alınmışdı – 2017-nin aprelində 0:3.
Arteta oyundan sonra belə dedi: “Pis oynadıq, xüsusən də ilk yarıda. Azarkeşlərimizdən üzr istəyirəm. Bu gün oyunumuzda ruh və ya özünənəzarət yox idi ki, bu da heç xoşuma gəlmədi. Bəzən belə günlər olur: heç nə alınmır, daim gecikirsən. Rəqib üstün idi, biz ona heç cür mane ola bilmədik. Yaxşı imkanlarımız olanda qol vurmadıq ki, oyunda intriqa bərpa olunsun. Tənqidi qəbul etməli, özümüzə baxmalı və növbəti oyunu gözləməliyik”.

•‎ Zədələnən Tomas Parti üçün oyun vaxtından əvvəl bitdi. “Arsenal” üçün növbəti problem Kiran Tirninin diz zədəsi oldu. Şotlandiyalı mövsümün qalan hissəsini buraxa bilər.

•‎ “Kristal Pelas”da isə işlər qaydasındadı. Buna qədər olan son 5 ev oyununda qələbə qazanmamalarına baxmayaraq, Patrik Vieyranın yetirmələri yaxşı formadadı. Onlar son 11 oyunun yalnız birində uduzub, son dördündə, ümumiyyətlə, qol buraxmayıblar. “Kristal Pelas”ı yaxınlarda “Çelsi” ilə ölkə kuboku uğrunda yarımfinal oyunu gözləyir.

•‎ Hesabı Jan-Filipp Mateta açdı. Fransalı son 4 oyunda 3 qol vurub. Və bu bir dirçəliş tarixçəsidi: Mateta payızda az oynayır, ona əsas heyətə yaxın hücumçu gözü ilə baxılmırdı. Qışda gözlənilmədən dirçəldi və indi qolları sıralayır.

•‎ Uilfrid Zahanı ayrıca qeyd etməliyik. O, 18-ci dəfə penalti qazandı (premyer-liqa tarixində yalnız Sterlinqlə Vardi Zahadan öndədi – uyğun olaraq, 23 və 21). Uilfrid ardıcıl 3-cü mövsümdə 10 və daha artıq qol vurur. “Pelas”ın tarixində bunu bacaran ilk futbolçudu.

•‎ Artetanın da dediyi kimi, “topçular” ilk yarıda bərbad təsir bağışladı. Baş məşqçinin Qabriel Martinellini ehtiyatda saxlamaq qərarı da anlaşılmaz idi. Martinelli – Edeoq – Saka – Lakazett “dördlüy”ü məhz ayrı-ayrı keyfiyyətlərin balansına görə yaxşıdı. Amma Qabrielin yoxluğunda heç kim müdafiəçilərin arxasına yaxşı ötürmə verə bilmir. 2-ci hissəyə görə Artetaya irad tutmaq çətindi. Onun dəyişikləri xoşagələn idi, “Arsenal”ın oyun keyfiyyəti artdı, çox səviyyəli müdafiəyə qarşı çoxlu qol vəziyyəti yarandl. Əslində hesab 1:2 olmalıydı, ondan sonra kim bilir oyunun axarı necə cərəyan edəcəkdi.

•‎ “Arsenal”ın məğlubiyyəti ilk “4-lük”də yer almaq, deməli, ÇL-ə vəsiqə qazanmaq uğrunda mübarizəni gərginləşdirdi. Bazar ertəsi “topçular” faktiki çox şeyi həll edə biləcək oyunun vaxtını da öyrəndi. “Tottenhem”lə yanvardan təxirə salınan derbi mayın 12-də keçiriləcək. Hələlik isə turnir cədvəlinin önündə vəziyyət belədi.

...3. Çelsi 29 17 8 4 58-23 59
4. Tottenhem 30 17 3 10 52-37 54
5. Arsenal 29 17 3 9 44-34 54
6. Vest Hem 31 15 6 10 51-40 51
7. Mançester Y. 30 14 9 7 49-41 51