Bu gün “Hilton” otelində “Səbail”in yeni idarə heyəti ilə təqdimat tədbiri keçirildi. Mərasimdə klubun strateji inkişaf planları, 2026/27 mövsümü üçün müəyyənləşdirilən hədəflər, infrastruktur və sosial layihələr, eləcə də gələcək fəaliyyət istiqamətləri barədə məlumat verildi.

Klub prezidenti Mirzə Bayrampur yeni futbolçularla müqavilə imzaladı. Ardından jurnalistlərin suallarını cavabladı.

- Mirzə müəllim, müsahibələrinizdə bildirmisiz ki, əsas prioritet dayanıqlılıqdı və bunun təməl prinsipi infrastrukturdu. Yaxın və gələcək perspektivdə infrastrukturla bağlı konkret hansı addımları atmağı düşünürsüz?
- Tural müəllim məlumat verdi, yəqin ki, komandanın adı dəyişiləcək və klub formatına keçəcək. Komandanı Qubaya daşımaq istəyirik və orda baza tikməyi planlaşdırırıq. Növbəti illər üçün əsas hədəflərimiz bunlardı. Uşaq futbolu üçün həm Qubada, həm də Bakıda bazaların yaradılmasını istəyirik. Eyni zamanda əsas komandanın da öz bazası və stadionu olmalıdı.

Quba Olimpiya Kompleksinin stadionu ilə bağlı müraciətlər olunub. İnşallah, hər şey yaxşı olsa, stadionun örtüyü, qazonu, drenaj və istilik sistemləri tam yenilənəcək və bunların hamısı klub tərəfindən təmin olunacaq. Gələcəkdə Qubada Avropa və FİFA standartlarına uyğun stadion və məşq meydançaları qurmaq istəyirik.

- Bəs komandanın adının dəyişdirilməsi prosesi ilə bağlı nə baş verir?
- Bu, normal prosedurdu. Azərbaycan hüquq dövlətidi və biz də qanunun tələb etdiyi qaydalara uyğun hərəkət edirik. Həm AFFA-ya, həm də Ədliyyə Nazirliyinə müraciət olunub. Müəyyən iş günü prosedurları var və hazırda həmin prosesin tamamlanmasını gözləyirik.

- Stadion məsələsi həll olunana qədər komanda harda çıxış edəcək?
- Bir neçə variantımız var. Bununla bağlı müraciətlər olunub və hazırda stadionlara baxış keçirilir. Yaxın vaxtlarda həm PFL-ə, həm də AFFA rəhbərliyinə, eləcə də ictimaiyyətə bu barədə məlumat verəcəyik.

- Siz qeyd etdiz ki, komandanın ehtiyacları böyüyəcək. Futbolda həm qələbə, həm də məğlubiyyət var. Komanda üç mövsüm ərzində premyer-liqaya yüksələ bilməsə, bu, planlara və ya sponsorlara təsir edəcəkmi?
- Bu, həyatın qanunudu. Uduzmağı bacarmalısan ki, qalib gəlməyi öyrənəsən. Əsas məqsədimiz davamlılığı qorumaqdı. Futboldu – udmaq da var, uduzmaq da. Məğlubiyyət o demək deyil ki, hər şeydən imtina etməlisən. Güclü klub yıxılandan sonra yenidən ayağa qalxa bilir. İnşallah, belə vəziyyətlə qarşılaşmarıq, amma olsa belə, yenə ayağa qalxarıq.

- Klubda uşaq futbolu da inkişaf edir. Növbəti mövsümdə neçə yaş qrupu iştirak edəcək? Qadın futbolu ilə bağlı planlar varmı?
- Hazırda uşaq yaş qruplarında dörd komanda iştirak edəcək. Bununla bağlı artıq PFL-ə müraciət olunub. Qadın futbolunda isə ilkin mərhələdə 14 və 16 yaş qrupları ilə çıxış edəcəyik və gələcəkdə bu say artırılacaq.

İSRAYIL XEYRULLAYEV