Nəriman Axundzadənin klubunu dəyişdiyindən xəbərdarsız. “Kolambus Kryu”nun şərəfini qoruyan hücumçu avqustun 3-dən bəri “Ərzurumspor”dadı. Deməli, həmvətənimiz artıq MLS-də yox, Türkiyə superliqasında forma geyəcək. Qardaş ölkə klubunun mətbuat xidmətinin yaydığı məlumata görə, Ərzurum təmsilçisi futbolçunu birilliyə icarəyə götürüb. Üstəlik yeni klubu “Kolambus Kryu” ilə imzalanan sənəddəki xüsusi bəndə görə tələb edilən təzminat məbləğini ödəsə, gələn ilin yayında hücumçunun tamhüquqlu sahibi ola bilər.

Xatırlayırsızsa, Ohayo təmsilçisi Nərimanı bu ilin əvvəlində “Qarabağ”dan 2,5 milyon avro müqabilində transfer etmişdi. Bu gün oyunçunun transfer bazarındakı dəyəri 2 milyon avro kimi qiymətləndirilir. Əlbəttə, bu fakt bizi təəccübləndirməməlidi. Azı ona görə ki, hücumçu ABŞ klubunda özünü yaxşı tərəfdən göstərə bilmədi. Ən əsası, MLS-də fərqlənə bilmədi. “Kolambus Kryu”da yaşanan baş məşqçi dəyişikliyi də Nərimanın yoluna işıq tutmadı. Ona Henrik Ridström də şans vermədi, müvəqqəti çalışdırıcı Loran Kurtua da. Maraq üçün qeyd edək ki, Axundzadə MLS-də meydanda olduğu 8 oyunda (6-sı ehtiyatdan daxil olmaqla) cəmi bir dəfə “çərçivə”yə zərbə endirə bildi. Acı reallıq olsa da, 203 dəqiqəni boşa verdi. Kəsəsi, həmvətənimizin ABŞ çempionatıyla bağlı yeganə uğuru bu yarışda forma geyən ilk azərbaycanlı futbolçu kimi tarixə düşməsi oldu. Kubok oyunlarında vurduğu qollara təsəlli gözü ilə baxmağa isə dəyməz. Hər halda, həmin oyunlar ilk mərhələlərdə keçirildiyindən rəqiblər yetərincə zəif idi. Nərimandan o vaxt ağızdolusu danışmaq mümkün olardı ki, Messinin də şərəfini qoruduğu “İnter Mayami”yə qarşı meydanda olsun. Çox arzulamırdıq, cəmi bir neçə dəqiqə. Bu da olmadı...

Ümumiyyətlə, Nəriman ABŞ çempionatında parlamaq imkanını əlinin arxası ilə uzaqlaşdırdı. Başqa sözlə, geriyə addım atdı. Təsəvvür edin, o, futbol dünyasının canlı əfsanəsi Messi ilə qarşılaşmaq ehtimalı olduğu halda, “Ərzurumspor”la danışıqlar içində idi. Sonda adı oyunun iştirak ərizəsinə belə salınmadı. Halbuki bu qarşılaşmada Nərimanın yox, DÇ-2026-nın yorğunluğunu atmaq məqsədilə istirahətdə olan Messinin meydana çıxmayacağı proqnozlaşdırılırdı. Lakin çətinliklə üzləşən futbolçu daha çox çalışmağı, promlemlərə sinə gərməyi yox, sözün əsl mənasında, növbəti dəfə qaçmağı, təslim olmağı seçdi! Bəli-bəli, növbəti dəfə. Axı o, “Qarabağ”dan da qaçaraq uzaqlaşmışdı. Sadəcə, səbəb fərqli idi: ictimai təzyiqlə mübarizə aparmaqda çətinlik çəkir, sağlam tənqidə belə məhəl qoymurdu. Məhz həmin vəziyyət Nərimanı “köhlən atlar”ın heyətindən qopardı, uzağa – ABŞ-nin şərqində yerləşən Ohayo ştatına apardı. Öz aramızdı, orda da futbolçunun ətrafında azərbaycanlı azarkeşləri görürdük. Ancaq hansısa böyük kütlədən söhbət gedə bilməz. 5-6 nəfər ona, demək olar, hər oyunda Lənkəranın ləzzətli ləvəngisindən gətirir, tribunalarda ölkəmizin bayraqlarını dalğalandırır, Nərimana xüsusi dəstək göstərirdilər. Təəssüf ki, bu məqam da futbolçunun əsas heyətdə möhkəmlənmək uğrunda mübarizəsinə yardım edə bilmədi. Belədə ağla məşhur bir məsəl gəlir: quyuya su tökməklə sulu olmaz!

Bəs indi Nərimanı nə gözləyir? 5 illik fasilədən sonra 1-ci liqada çempion olan “Ərzurumspor”. Onun burda nə dərəcədə uğurlu olacağı sual altındadı. Bəlkə torba-torba qollar vuracaq, bəlkə burda da uğursuz mövsüm keçirəcək. Bunu yalnız Allah bilir. Hər halda, arzumuz ilk ehtimaldı. Lakin belə xarakterlə irəli addımlamaq yetərincə çətin olacaq. Nəriman artıq məğlub olmaqdan, taleyinə boyun əyməkdən çəkinmir. Nəriman artıq ən təhlükəli xəstəliyə - təslimçiliyə yoluxub. Allah köməyin olsun, qardaş!

KƏNAN BAHADIR