Altay Bayındırın ''Mançester Yunayted''i tərk edəcəyi ilə bağlı yayılan iddialar təsdiqini tapıb.

Son günlər adı ''Selta'' ilə yanaşı hallanan qapıçının İspaniya təmsilçisinə keçidi rəsmiləşib. Hər iki klub transferin tamamladığını açıqlayıb.

Türkiyəli əlcək sahibi qarşıdakı mövsümü icarə əsasında Viqo klubunda keçirəcək. ''Selta''nın icarə haqqı kimi ''Yunayted''ə nə qədər ödədiyi barədə məlumat verilmir. Amma bu klub Altayı gələn yay daimi əsasda transfer edə bilmək hüququnu da ələ keçirib. ''Selta'' bu hüquqdan yararlanmaq istəsə, İngiltərə nəhənginə 4 milyon avro ödəyəcək. Bunun 800 min avrosu isə Altayın əvvəlki klubu ''Fənərbaxça''ya çatacaq.

Maraqlıdı ki, ''Selta'' sosial şəbəkədə bu transferi Türkiyədə qatıldığı yarışma verilişləri ilə fenomen səviyyəsinə yüksələn və gözləri görməyən Bilal Göregenin videosu ilə açıqlayıb. Göregenin ''Livan Polka'' mahnısını səsləndirdiyi videonun altında ''Viqodan salamlar, türk qardaşlarım'' ifadəsi yazılıb.

''Yunayted''də keçirdiyi 3 mövsüm ərzində ehtiyat qapıçı statusundan qurtula bilməyən və yalnız 17 rəsmi oyuna çıxan 28 yaşlı qapıçının İspaniyada necə performans göstərəcəyi böyük maraq doğurur.

Altay artıq İtaliyada toplanışda olan ''Selta''nın düşərgəsinə yollanıb. Onun sabah ''Napoli''yə qarşı hazırlıq oyununda şans qazanacağı gözlənilir.