Azarkeşlərə gecikmiş müraciət

25-30 il öncə olsaydı, bugünü hamı həsrətlə gözləyərdi. Ölkənin müxtəlif yerlərində hamı qərb derbisi haqda danışardı, futbolçuları bir-biri ilə müqayisə edərdi. Kimisə digərindən güclü çıxarmağa çalışardılar. Bu söhbətlərin hamısı “Turan Tovuz” – “Kəpəz” oyunu ətrafında baş verərdi. Adama çox pis təsir edir bu ajiotaj barədə keçmiş zamanda danışmaq. İndiki dövrdə idman jurnalisti olmaq da bir şey deyil. Stajlı həmkarlar, müstəqilliyin ilk illərindən çalışanlar stadionlardakı ab-havadan, “Turan” – “Neftçi”, “Kəpəz” – “Qarabağ”, “Neftçi” – “Kəpəz”, “Turan” – “Kəpəz” oyunlarında başverənlərdən bəh-bəhlə danışır. Düzdü, mən də belə oyunlar görmüşəm. “Xəzər Lənkəran” – “Neftçi”, elə “Kəpəz” – “Neftçi”, “Kəpəz” – “Qarabağ” matçlarında qeydə alınan azarkeş rekordlarının jurnalist kimi şahidi olmuşam. Amma bu, komandaların iddialı olmadıqları vaxtlara təsadüf edib. Bir sözlə, belə gözəl xatirələri olduqları üçün stajlı həmkarlarıma yaxşı mənada paxıllıq edirəm.

Bu gün Azərbaycan futboluna yüzlərlə istedad bəxş edən iki şəhərin komandası üz-üzə gələcək. Qərb derbisi! Necə də əzəmətli səslənir. Amma komandaların bu əzəməti qalıb? Yox! İnsanlar bu görüşə maraq göstərmirlər. Hətta “Turan Tovuz” rəhbərliyi satışa çıxarılan biletlərin pulunu Türkiyədə baş verən zəlzələ qurbanlarına yardım üçün göndərəcək. Bu təşəbbüs oyuna marağı bir qədər artırıb. Media yazdı, dəstək oldu, insanlarda maraq yarandı. Amma nə qədər belə davam edər? Ölkə futbolunun beşiyi sayılan iki şəhərin komandası son pillələr uğrunda mübarizə aparır. “Turan Tovuz” yeni sponsor tapıb deyə sevinirik. Bu komanda ilə adı birgə çəkilsin deyə şirkətlər sıraya düzülməlidi. Ölkəmizi avrokuboklarda ilk təmsil edən məhz “Turan” olub.

“Kəpəz”dən danışmağa ehtiyac yoxdu. Klub qalıb ortalıqda. Kimlərsə vəzifədə qalsın deyə adı hər gün qalmaqallarda hallanır. Hər şeyi kənara qoyaq. “Kəpəz”in stadionu yoxdu. O stadion məhv olub. Zorla qəbul etdirməyə çalışırlar ki, Gəncə şəhər stadionu deyə bir yer var. Yoxdu elə bir yer. Ora xarabaxanadı. Bəlkə də əcnəbi futbolçular dost-tanışları ilə söhbətlərdə bizimlə məzələnirlər. Necə ki “Sabah”ın baş məşqçisi Murad Musayev futbolçuların konteynerdə paltarlarını dəyişməsini biabırçılıq adlandırmışdı.

Tez-tez adı çəkilən stadionlara səfər edirəm. Adam dəhşətə gəlir. Şəxsən mən Benzyanın yerində olsaydım, düşünərdim ki, hara gəlmişəm? Azərbaycanda belə xarabalığa bənzəyən stadionlar var? Bəs “Qarabağ”? Ardıcıl 9 il avrokubokların qrup mərhələsində iştirak etmək? Yəni əcnəbi futbolçuların gözləri ilə dediklərini, baxışlarını anlamaq bu qədər qəlizdi? Utanmırlar “klub rəhbəriyəm” deyərək ortalıqda gəzən kostyumlu, özünə savadlı deyən şəxslər? Sözdə futbolun inkişafını düşünüb, amma transferlərdən onminlər, yüzminlər mənimsəyənlər?

Stop! Əndazəni aşmaq olmaz! Amma bu, mənə aid deyil. Əndazəni aşmağa cəhd edənlərədi sözüm. Utanmağınız yoxdusa, azarkeşlərin qəzəbindən qorxun! Onminlərlə, yüzminlərlə azarkeşi olan “Turan Tovuz”la “Kəpəz”in əzəmətindən çəkinin. Bu fanatlar sizə elə toy tutar ki...

Bu gün qərb derbisi var. Azərbaycan futbolunun beşiyi sayılan Tovuzda iki adlı-sanlı klubumuz qarşı-qarşıya gələcək. Bəlkə də bu çağırış üçün gecdi. Amma tovuzlulardan, gəncəlilərdən xahiş edirəm ki, 6500 yerlik stadionu doldursunlar. Bunu etmək o qədər də çətin deyil. Şənbə günü, istirahət vaxtı. Bu say Azərbaycan futbolu üçün nədi ki? Qərb derbisində ajiotaj yaradın ki, ölkəmizdə bu idman növünü sevdiklərini görsünlər. Azərbaycan futbolunun sahibsiz olduğunu sanıb, talan etməyə cəsarət etməsinlər!

İLKİN SULTANLI