Bazar ertəsi saat 04.17-də Türkiyənin Kahramanmaraş şəhərində yaşanan və digər bölgələrdə, eləcə də Suriyada böyük dağıntılara səbəb olan 7,7 bal gücündə dəhşətli zəlzələnin fəsadları davam edir.

Football-plus.az xəbır verir ki, bu ana olan məlumatda 3300-dən çox insanın dünyasını dəyişməsi barədə xəbər var.

Qardaş ölkədə 7 günlük matəm elan olunub, eləcə də bütün idman tədbirləri təxirə salınıb. Futbol dünyasından olanlar da bacardıqları qədər yardım etməyə çalışırlar.

Türkiyə Futbol Federasiyası AFAD-ın yardım kampaniyasına 20 milyon lirə bağışlandığını açıqlayıb. Bundan başqa tanınmış sənətçi Haluk Levəntin başladığı yardım kampaniyasına məhşur futbolçular böyük dəstək veriblər.

''Atalanta''nın üzvü Merih Dəmiral 1 milyon lirə ilə ilk dəstək verən futbolçu olub. Levəntin sözlərinə görə sonrakı saatlarda Burak Yılmaz 300 min lirə, ''Fənərbaxça''lı Mərt Hakan Yandaş 200 min lirə, müqavilə ilə ''Qalatasaray''a məxsus olan Əmrə Kılınc 150 min lirə, sabiq ''Qalatasaray''lı Hakan Baltanın 300 min lirə, aktyor Kıvanc Tatlıtuğ ilə müğənni Mustafa Cecelinin də hərəsi 200 min lirə bağışlayıb. Avropada karyerasını davam etdirən Cengiz Ündər ilə Çağlar Söyüncü hərəyə 50 min avro yardım edib.

Bu arada Söyüncü zəlzələ bölgələrində salamat qalmış dükanlarda ərzaqların qiymətlərini süni şəkildə qaldıranlara sərt etirazını bildirərək onları Allaha tapşırıb.

TFF-nin bu gün Türkiyə çempionatı və digər liqalarla bağlı qərar qəbul edəcəyi, bunu rəsmən açıqlayacağı gözlənilir.